IANS நிறுவனம் Matrize உடன் இணைந்து நடத்திய தேர்தல் கருத்துக்கணிப்பில், தவெக 6 முதல் 12 இடங்களில் வெற்றி பெறக்கூடும் எனத் தெரிவிக்கப்பட்டுள்ளது. இந்தக் கருத்துக்கணிப்பின்படி, திமுக கூட்டணியை விட அதிமுக லீடிங்கில் உள்ளது.
5 மாநில சட்டசபை தேர்தல் தேதி அதிகாரபூர்வமாக நேற்று தேர்தல் ஆணையத்தால் அறிவிக்கப்பட்டுவிட்டது. தமிழகத்தில் ஏப்ரல் 23 ஆம் தேதி தேர்தல் நடைபெற இருப்பதாக தலைமை தேர்தல் ஆணையர் தெரிவித்தார். தமிழ்நாடு புதுச்சேரி, கேரளா, மேற்கு வங்கம், அசாம் ஆகிய மாநிலங்களின் தேர்தல் தேதியை தேர்தல் ஆணையர் அறிவித்தார். இதனைத்தொடர்ந்து தேர்தல் பணிகளை அரசியல் கட்சிகள் தீவிரப்படுத்தியுள்ளன.
இந்நிலையில், IANS நிறுவனம் Matrize உடன் இணைந்து நடத்திய தேர்தல் கருத்துக்கணிப்பு முடிவுகளை வெளியிட்டு உள்ளது. இவர்கள் வெளியிட்டுள்ள கருத்துக்கணிப்பின்படி அதிமுக – பாஜக கூட்டணி தான் தமிழக சட்டசபை தேர்தலில் முன்னிலையில் இருப்பதாக தெரிவிக்கப்பட்டுள்ளது.
சட்டசபை தேர்தலில் தமிழகத்தில் மொத்தம் உள்ள 234 தொகுதிகளில், அதிமுக114 தொகுதிகள் முதல் 127 தொகுதிகள் வரை வெற்றிபெறும் என்றும் திமுக 104 முதல் 114 தொகுதிகள் வரை வெற்றிபெறும் என்றும் தெரிவிக்கப்பட்டுள்ளது. இவர்களை தொடர்ந்து மூன்றாம் இடத்தில் தவெக கட்சி உள்ளது. IANS – Matrize கருத்துக்கணிப்பின்படி தமிழக வெற்றிக் கழகம் 6 முதல் 12 தொகுதிகள் வரை வெற்றி பெறலாம் எனத் தெரிவிக்கப்பட்டுள்ளது. பிற கட்சிகள் 1 முதல் 6 தொகுதிகளில் வெற்றி பெறக்கூடும் எனத் தெரிவிக்கப்பட்டுள்ளது.
தொகுதி வாரியாக கருத்துக்கணிப்பு ஒருபுறம் இருக்க வாக்கு சதவீதம் வாரியாகவும் கருத்து கணிப்பை வெளியிட்டுள்ளது IANS. அதன்படி அதிமுக கூட்டணிக்கு 39 முதல் 40 % வாக்குகள் கிடைக்கும், திமுக கூட்டணிக்கு 37 – 38 சதவீதம் வாக்குகள் கிடைக்கும் என்றும், தமிழக வெற்றிக் கழகத்துக்கு 14 -15 % வாக்குகள் கிடைக்கும் என கருத்துக்கணிப்பில் தெரிவிக்கப்பட்டுள்ளது.
இதர கட்சிகளுக்கு 12% வாக்குகள் கிடைக்கும் என்றும் கருத்து கணிப்பில் தெரிவிக்கப்பட்டுள்ளது. இந்தக் கருத்து கணிப்பில் திமுகவை காட்டிலும் தொகுதியிலும் வாக்குகளிலும் அதிமுக கூட்டணி முன்னிலையில் இருப்பது அரசியல் பார்வையாளர்களை கவனிக்க வைத்துள்ளது.