அமெரிக்கா, ஈரான் அணு ஆயுதத் திட்டத்தில் ஈடுபட்டுள்ளதாக குற்றம்சாட்டி வந்த நிலையில், பிப்ரவரி 28ஆம் தேதி தாக்குதலை தொடங்கியதாக கூறப்படுகிறது. இஸ்ரேலும் அதில் இணைந்து ஈரானின் முக்கிய பகுதிகளை குறிவைத்து வான்வழித் தாக்குதல் நடத்தியதாக தகவல்கள் தெரிவிக்கின்றன.
இந்த தாக்குதலில் ஈரானின் உச்சத் தலைவர் கமேனி தங்கியிருந்த இடமும் பாதிக்கப்பட்டதாக செய்திகள் வெளியாகின. இதையடுத்துடொனால்ட் ட்ரம்ப், கமேனி உயிரிழந்ததாக அறிவித்ததாக கூறப்படுகிறது. ஈரான் தரப்பும் 40 நாட்கள் துக்கம் அனுசரிக்கப்படும் என அறிவித்து, ஒரு வாரம் பொது விடுமுறை அறிவித்ததாக தகவல்கள் வெளியாகியுள்ளன.
இந்த பதற்றம் விமான போக்குவரத்தையும் பாதித்துள்ளது. சென்னையிலிருந்து மத்திய கிழக்கு நாடுகளுக்குச் செல்லும் 14 விமானங்கள் ரத்து செய்யப்பட்டதாக கூறப்படுகிறது. பயணிகள் பலரும் சிரமத்திற்கு உள்ளாகியுள்ளனர்.
தங்கம், வெள்ளி விலையில் திடீர் ஏற்றம்
பொதுவாக ஞாயிற்றுக்கிழமை சந்தை மூடப்பட்டிருப்பதால் சனிக்கிழமை விலையே தொடரும். ஆனால் இந்த முறை போர் சூழல் காரணமாக விலை உயர்வு பதிவாகியுள்ளது.
* ஒரு சவரன் தங்கம் ரூ.1,800 உயர்ந்து ரூ.1,26,200 ஆக விற்பனை
* ஒரு கிராம் ரூ.225 உயர்ந்து ரூ.15,775
* வெள்ளி கிராமுக்கு ரூ.5 உயர்ந்து ரூ.325
* வெள்ளி கிலோ ரூ.3,25,000
கடந்த இரண்டு நாட்களில் மட்டும் தங்கம் சவரனுக்கு ரூ.7,000 வரை உயர்ந்துள்ளதாக கூறப்படுகிறது.
தங்க நகை வணிகர் சங்கத் தலைவர் ஜெயந்திலால் சலானி, இந்த உயர்வு முழுவதும் மத்திய கிழக்கு போர்ப்பதற்றத்தால் ஏற்பட்டது என விளக்கினார். உலக பொருளாதாரத்தில் பாதிப்பு ஏற்படும் என்ற அச்சத்தால் முதலீட்டாளர்கள் பாதுகாப்பான முதலீடாக தங்கத்தைத் தேர்வு செய்து வருவதாக அவர் குறிப்பிட்டார்.
மேலும் ரஷ்யா மற்றும் சீனா ஆகிய நாடுகளும் ஈரானை தனிமைப்படுத்த அனுமதிக்கமாட்டோம் என எச்சரிக்கை விடுத்துள்ளன. இது உலகளாவிய பதற்றத்தை மேலும் அதிகரிக்கக்கூடும் என்பதால், தங்கம் மற்றும் வெள்ளி விலைகள் இன்னும் உயர வாய்ப்பு இருப்பதாக சந்தை வட்டாரங்கள் மதிப்பிடுகின்றன.
ஏற்கனவே உலகளாவிய அரசியல் மற்றும் பொருளாதார பதற்றங்கள் காரணமாக உயர்ந்து கொண்டிருந்த தங்கம், இந்நிலையால் மேலும் ஏற்றத்தை காணலாம் என்ற அச்சம் பொதுமக்களிடையே நிலவுகிறது.
