நெல்லை மற்றும் தென்காசி மாவட்ட எல்லையோரப் பகுதிகளில் அடுத்தடுத்து பொதுமக்களை அரிவாளால் வெட்டி, பெரும் பதற்றத்தை ஏற்படுத்திய வழக்கில் தேடப்பட்டு வந்த முக்கிய குற்றவாளி ஐயப்பனைப் போலீஸார் துப்பாக்கியால் சுட்டுப் பிடித்துள்ளனர்.
தென்காசி மாவட்டம் ஆலங்குளம் அருகேயுள்ள நெட்டூர் கிராமத்தில் நடந்த ஒரு திருமண விழாவின் முன்விரோதம் காரணமாக, இருசக்கர வாகனங்களில் வந்த முகமூடி அணிந்த கும்பல் ஒன்று கடைகளில் இருந்த பொதுமக்கள் மற்றும் சாலையில் சென்றவர்கள் மீது கொடூரமான அரிவாள் தாக்குதலை நடத்தியது. இதே கும்பல் திருநெல்வேலி மாவட்டம் மானூர் பகுதிக்குட்பட்ட தெற்குப்பட்டியிலும் புகுந்து பொதுமக்கள் மீது தாக்குதல் நடத்தியதில், இரு மாவட்டங்களிலும் சேர்த்து மொத்தம் 8 பேர் படுகாயமடைந்தனர்.
சட்டம் ஒழுங்கு சீர்குலைந்ததைத் தொடர்ந்து, குற்றவாளிகளை உடனே கைது செய்யக் கோரி பொதுமக்கள் போராட்டத்தில் ஈடுபட்டனர். இதையடுத்து, குற்றவாளிகளைப் பிடிக்க மாவட்ட காவல் கண்காணிப்பாளரின் உத்தரவின் பேரில் தனிப்படைகள் அமைக்கப்பட்டன. சிசிடிவி (CCTV) காட்சிகளின் அடிப்படையில் ஏற்கனவே இந்த கும்பலைச் சேர்ந்த 4 பேர் கைது செய்யப்பட்ட நிலையில், தலைமறைவாக இருந்த முக்கிய நபரான ஐயப்பனைத் தனிப்படை போலீஸார் தீவிரமாகத் தேடி வந்தனர்.
தனிப்படை போலீஸார் ஐயப்பனை வளைத்துப் பிடிக்க முயன்ற போது, அவன் தப்பியோட முயன்றதோடு போலீஸாரை நோக்கித் தாக்குதலில் ஈடுபட்டதாகத் தெரிகிறது. தற்காப்புக்காகவும், அவனைப் பிடிப்பதற்காகவும் போலீஸார் துப்பாக்கியால் சுட்டதில் ஐயப்பனின் காலில் குண்டு பாய்ந்தது.
இந்த பிடிவாரண்ட் நடவடிக்கையின் போது, ஐயப்பனை மடக்கிய தனிப்படை காவலர்களுக்கும் காயம் ஏற்பட்டுள்ளதாகத் தகவல்கள் வெளியாகியுள்ளன.
காயமடைந்த குற்றவாளி ஐயப்பன் மற்றும் காயமடைந்த காவலர்கள் உடனடியாக மீட்கப்பட்டு பலத்த போலீஸ் பாதுகாப்புடன் அரசு மருத்துவமனையில் சிகிச்சைக்காக அனுமதிக்கப்பட்டுள்ளனர்.
இச்சம்பவம் நெல்லை, தென்காசி மாவட்ட எல்லைப் பகுதிகளில் பெரும் பரபரப்பை ஏற்படுத்திய நிலையில், வன்முறை மீண்டும் வெடிக்காமல் இருக்க நெட்டூர் உள்ளிட்ட பகுதிகளில் கூடுதல் போலீஸார் குவிக்கப்பட்டு பாதுகாப்பு பலப்படுத்தப்பட்டுள்ளது.
