நெல்லை மாவட்ட அறிவியல் மையத்தில் மழை வெள்ளத்தால் 5 கோடி ரூபாய் அளவுக்குச் சேதம் ஏற்பட்டுள்ளதாகவும், 70 லட்சம் ரூபாய் மதிப்பில் அமைக்கப்பட்டு வரும் மாதிரி விண்வெளி மையம் இன்னும் இரண்டு மாதத்தில் பயன்பாட்டிற்கு வரும் என்றும் பெங்களூர் விஸ்வேஸ்வரய்யா தொழில்நுட்ப கழகத்தின் தென்மண்டல இயக்குனர் சஜூ பாஸ்கரன் நெல்லையில் அளித்த பேட்டியில் தெரிவித்துள்ளார்.
நாடு முழுவதும் ஒன்றிய அரசின் கீழ் 27 மாவட்ட அறிவியல் மையங்கள் செயல்பட்டு வருகின்றன தெற்கு மண்டலத்தில் மட்டும் தமிழகத்தின் நெல்லை மாவட்ட அறிவியல் மையம் உள்பட ஐந்து மையங்கள் செயல்பட்டு வருகிறது.இந்த நிலையில் கடந்த ஆண்டு டிசம்பர் மாதம் நெல்லை தாமிரபரணி ஆற்றில் ஏற்பட்ட பெரும் வெள்ளத்தின்போது கொக்கிரக் குளத்தில் உள்ள மாவட்ட அறிவியல் மையத்துக்குள் தண்ணீர் புகுந்து கடும் சேதமானது. குறிப்பாக அறிவியல் மையத்தைச் சுற்றி அமைக்கப்பட்டுள்ள சுற்றுச் சுவர் இடிந்து விழுந்தது. அதேபோல் கட்டிடத்திற்குள் தண்ணீர் புகுந்ததால் அங்கு வைக்கப்பட்டிருந்த அறிவியல் தொழில்நுட்ப கருவிகளும் சேதமாகின.
இந்த நிலையில் பெங்களூர் விஸ்வேஸ்வரய்யா அறிவியல் தொழில்நுட்ப அருங்காட்சியகத்தின் தென் மண்டல இயக்குனர் சஜூ பாஸ்கரன் இன்று நெல்லை மாவட்ட அறிவியல் மையத்திற்கு வருகை தந்தார். பின்னர் மழை வெள்ளத்தால் ஏற்பட்ட சேதங்களைப் பார்வையிட்டார். தொடர்ந்து 70 லட்சம் ரூபாய் மதிப்பில் அமைக்கப்பட்டு வரும் மாதிரி விண்வெளி மையத்தையும் இயக்குனர் சஜூ பாஸ்கரன் நேரில் பார்வையிட்டு ஆய்வு செய்தார்.
அதைத்தொடர்ந்து அவர் செய்தியாளர்களுக்கு அளித்த பேட்டியில், நெல்லை மழை வெள்ளத்தால் அறிவியல் மையத்தில் சுமார் 5 கோடி அளவிற்கு சேதம் ஏற்பட்டுள்ளது அறிவியல் தொழில்நுட்பக் கருவிகளும் வெள்ளத்தால் சேதம் ஆகி உள்ளன அவற்றைச் சரி செய்யும் பணி தொடர்ந்து நடைபெற்று வருகிறது இன்னும் ஆறு மாதத்தில் முழுமையாக நெல்லை மாவட்ட அறிவியல் மையம் சீரமைக்கப்படும் தற்போது 70 லட்சம் ரூபாய் மதிப்பில் இங்கு மாதிரி விண்வெளி மையம் அமைக்கப்பட்டு வருகிறது இன்னும் இரண்டு மாதத்தில் அது பயன்பாட்டிற்கு வரும் சந்திராயன் மங்கள்யான் செயற்கை கோள்களுக்குப் பிறகு மாணவர்கள் மத்தியில் விண்வெளி ஆராய்ச்சிகுறித்த விழிப்புணர்வு அதிகரித்துள்ளது எனவே இந்த மாதிரி விண்வெளி மையம் அவர்களுக்குப் பெரிதும் பயனுள்ளதாக இருக்கும் என்று தெரிவித்தார்.