தமிழ்நாடு வானிலை நிலவரம் – அடுத்த சில நாட்கள் மழைக்கு வாய்ப்பு!

தமிழ்நாட்டில் நிலவும் வளிமண்டலக் கீழடுக்குக் காற்றழுத்தத் தாழ்வுப் பாதை காரணமாக, மேற்குத் தொடர்ச்சி மலை மாவட்டங்கள் மற்றும் வட கடலோரத் தமிழகத்தில் இன்று இடி, மின்னல் மற்றும் பலத்த காற்றுடன் கூடிய மிதமான மழை பெய்யக்கூடும் எனச் சென்னை வானிலை ஆய்வு மையம் தெரிவித்துள்ளது.

இதுகுறித்து வெளியிடப்பட்டுள்ள வானிலை முன்னறிவிப்பு விவரங்கள்:

ஆகஸ்ட் 17 (இன்று): மேற்குத் தொடர்ச்சி மலை மாவட்டங்கள், வட கடலோரத் தமிழகம், புதுவை மற்றும் காரைக்கால் பகுதிகளில் மணிக்கு 40 முதல் 50 கி.மீ. வேகத்தில் வீசும் பலத்த காற்று மற்றும் இடி, மின்னலுடன் கூடிய மிதமான மழை பெய்ய வாய்ப்புள்ளது. ஏனைய பகுதிகளில் லேசான மழை பெய்யக்கூடும்.

ஆகஸ்ட் 18: செங்கல்பட்டு மற்றும் விழுப்புரம் மாவட்டங்களில் ஓரிரு இடங்களில் கனமழையும், மேற்குத் தொடர்ச்சி மலை மற்றும் வட கடலோரப் பகுதிகளில் மிதமான மழையும் பெய்யக்கூடும்.

ஆகஸ்ட் 19: நீலகிரி, சென்னை, செங்கல்பட்டு, திருவள்ளூர் மற்றும் விழுப்புரம் மாவட்டங்களில் ஓரிரு இடங்களில் இடி, மின்னலுடன் கூடிய கனமழை பெய்ய வாய்ப்புள்ளது.

வரும் ஆகஸ்ட் 21 வரை தமிழகத்தில் அதிகபட்ச வெப்பநிலையில் பெரிய அளவில் மாற்றங்கள் இருக்காது என எதிர்பார்க்கப்படுகிறது. இருப்பினும், வட உள் தமிழகத்தில் வெப்பநிலை இயல்பை விட 2 முதல் 4 டிகிரி செல்சியஸ் வரை சற்று அதிகமாக இருக்கக்கூடும்.

சென்னை மற்றும் புறநகர் பகுதிகளைப் பொறுத்தவரை, அடுத்த இரண்டு நாட்களுக்கு வானம் ஓரளவு மேகமூட்டத்துடன் காணப்படும். மாலை அல்லது இரவு வேளைகளில் நகரின் சில பகுதிகளில் இடி, மின்னலுடன் கூடிய லேசான அல்லது மிதமான மழை பெய்ய வாய்ப்புள்ளது. மேலும், அதிகபட்ச வெப்பநிலை 36° முதல் 37° செல்சியஸை ஒட்டி இருக்கக்கூடும் எனத் தெரிவிக்கப்பட்டுள்ளது.