சென்னை:
அதானி குழுமத்திடம் லஞ்சம் பெற்ற நிறுவனங்கள் பட்டியலில் தமிழக மின்வாரியம் இடம் பெற்றிருப்பது குறித்து அரசு விசாரணை நடத்த வேண்டும் என்று பாமக நிறுவனர் ராமதாஸ் வலியுறுத்தியுள்ளார்.
இதுகுறித்து அவர் நேற்று வெளியிட்ட அறிக்கையில் கூறியிருப்பது, இந்தியாவில் பல்வேறு மாநிலங்களில் மின்சார வாரியங்களுக்கு சூரிய ஒளி மின்சாரம் தயாரித்து வழங்குவதற்கான ஒப்பந்தங்களைப் பெற ரூ.2,100 கோடி லஞ்சம் கொடுக்கப்பட்டதை மறைத்து, அமெரிக்காவில் முதலீடு திரட்டியது தொடர்பாக அதானி குழும நிறுவனங்கள்மீதும், அவற்றின் தலைவர் கவுதம் அதானி உள்ளிட்டோர் மீதும் அமெரிக்க நீதிமன்றத்தில் அந்நாட்டு அரசு வழக்கு தொடர்ந்திருக்கிறது. இந்த வழக்கில் அதானியைக் கைது செய்யப் பிடியாணை பிறப்பிக்கப்பட்டுள்ளது.
நியூயார்க் கிழக்கு மாவட்ட நீதிமன்றத்தில் தாக்கல் செய்யப்பட்ட வழக்கு ஆவணத்தில், 20 மற்றும் 21-ஆம் பத்திகளில் தமிழக மின்வாரியமும், அதன் அதிகாரிகளும் இதில் சம்பந்தப்பட்ட நிறுவனங்கள் மற்றும் அவற்றின் அதிகாரிகள் என்று குறிப்பிடப்பட்டுள்ளனர். 50-ம் பத்தியில், ‘கடந்த 2021 ஜூலை முதல் 2022 பிப்ரவரி வரை இந்திய அரசு அதிகாரிகளுக்குக் கையூட்டு வழங்குவதாக அளிக்கப்பட்ட வாக்குறுதியின் அடிப்படையில், ஒடிசா, ஜம்மு – காஷ்மீர், தமிழகம், சத்தீஸ்கர், ஆந்திரம் ஆகிய மாநிலங்களின் மின்சார வாரியங்கள் இந்திய சூரிய ஒளி மின்னுற்பத்திக் கழகத்திடமிருந்து உற்பத்தியுடன் இணைந்த திட்டத்தின்படி சூரிய ஒளி மின்சாரம் வாங்குவதற்கான ஒப்பந்தங்களைச் செய்து கொண்டிருக்கின்றன.
இவற்றில் ஆந்திர மின்சார வாரியத்துக்கு 7 ஜிகாவாட் சூரிய ஒளி மின்சாரம் வழங்குவதற்கான ஒப்பந்ததைப் பெறுவதற்காக அம்மாநில மின்வாரிய அதிகாரிகளுக்கு ரூ.1,750 கோடி லஞ்சம் வழங்கப்பட்டதாகக் கூறப்பட்டிருக்கிறது. லஞ்சம் பெற்ற நிறுவனங்கள் பட்டியலில் தமிழக மின்வாரியத்தின் பெயரும் இடம் பெற்றுள்ளது.
அதுமட்டுமின்றி, லஞ்சம் வழங்கப்பட்டதாக அந்த ஆவணத்தில் குறிப்பிடப்பட்டுள்ள காலகட்டத்தில்தான், அதாவது 2021-ம் ஆண்டு செப்.16-ம் தேதி, அதானி குழுமத்தால் உற்பத்தி செய்யப்படும் 1000 மெகாவாட் சூரிய ஒளி மின்சாரத்தை இந்திய சூரிய ஒளி மின்னுற்பத்திக் கழகத்தின் வாயிலாக வாங்கும் ஒப்பந்தத்தில் தமிழக மின்வாரியமும், இந்திய சூரிய ஒளி மின்னுற்பத்திக் கழகமும் கையெழுத்திட்டுள்ளன. இந்த ஒப்பந்தம் அமெரிக்க நீதிமன்ற குற்றச்சாட்டை உறுதி செய்கிறது.
தமிழக மின் வாரியம் ரூ.1.8 லட்சம் கோடிக்கும் கூடுதலான கடன் சுமையில் சிக்கித் தவிக்கிறது. இதற்குக் காரணம் அதானிகுழுமம் போன்ற நிறுவனங்களிடமிருந்து லஞ்சம் வாங்கிக்கொண்டு அதிக விலைக்கு மின்சாரத்தை வாங்குவதுதான். ஆட்சியாளர்களின் லாபம் மற்றும் சுயநலத்துக்காகப் பொதுத்துறை நிறுவனங்களை நஷ்டத்தில் தள்ளுவதையும், அப்பாவி மக்கள் மீதுமின்கட்டண சுமையைச் சுமத்துவதையும் அனுமதிக்க முடியாது. அதானி குழுமத்தால் லஞ்சம் வழங்கப்பட்ட நிறுவனங்கள் பட்டியலில் தமிழக மின்வாரியத்தின் பெயரும் இடம்பெற்றுள்ள நிலையில், இதுகுறித்து தமிழக அரசு விசாரணைக்கு உத்தரவிட வேண்டும்.
