கால்நடை மருத்துவ அறிவியல் மற்றும் கால்நடை பராமரிப்பு (BVSc & AH) பட்டப்படிப்பிற்கான மாணவர் சேர்க்கையை, பொது நுழைவுத் தேர்வு அல்லது ‘நீட்’ (NEET) தேர்வின் அடிப்படையில் நடத்தாமல், மேல்நிலைப் பள்ளி மேல்நிலைத் தேர்வு (12-ஆம் வகுப்பு) மதிப்பெண்கள் அடிப்படையிலேயே தொடர அனுமதிக்க வேண்டும் என்று வலியுறுத்தி, தமிழ்நாடு முதலமைச்சர் ஜோசப் விஜய் பிரதமர் நரேந்திர மோடிக்கு கடிதம் எழுதியுள்ளார்.
இந்திய கால்நடை மருத்துவ கவுன்சில், 2026-27 கல்வியாண்டு முதல் இப்படிப்புகளுக்கு மையப்படுத்தப்பட்ட நுழைவுத் தேர்வு அல்லது நீட் தரவரிசையை கட்டாயமாக்க பரிந்துரைத்துள்ள நிலையில், இந்த நடவடிக்கை தமிழ்நாடு மாநிலத்திற்குப் பெரும் பாதிப்பை ஏற்படுத்தும் என முதல்வர் சுட்டிக்காட்டியுள்ளார்.
தமிழ்நாட்டின் வேளாண்மை மற்றும் கிராமப்புற மக்களின் வாழ்வாதாரத்தோடு நெருங்கிய தொடர்புடைய கால்நடை மருத்துவக் கல்வியில், 12-ஆம் வகுப்பு மதிப்பெண் அடிப்படையிலான சேர்க்கை முறையே சமூக நீதி, பிராந்திய சமத்துவம் மற்றும் கிராமப்புற மாணவர்களுக்கான வாய்ப்பை உறுதிசெய்து வருகிறது.
‘நீட்’ போன்ற நுழைவுத் தேர்வுகள் பயிற்சி மையங்களைச் சார்ந்திருக்கச் செய்வதோடு, தேசியத் தேர்வுகள் முகமையின் (NTA) பல்வேறு குளறுபடிகள் மற்றும் வினாத்தாள் கசிவு விவகாரங்கள் இத்தேர்வுகளின் நம்பகத்தன்மையை கேள்விக்குள்ளாக்கியுள்ளன. எனவே, மாநிலங்களின் கூட்டாட்சித் தத்துவத்தையும், சமூகச் சூழலையும் மதித்து, மாணவர் சேர்க்கை அளவுகோல்களை அந்தந்த மாநில அரசுகளே தீர்மானிக்கும் உரிமையை வழங்க இந்திய கால்நடை மருத்துவ கவுன்சிலுக்கு பிரதமர் அறிவுறுத்த வேண்டும் என முதல்வர் வலியுறுத்தியுள்ளார்.