புதுச்சேரி:
புதுவை குயவர்பாளையத்தைச் சேர்ந்த அசோக்ராஜா என்பவர் தகவல் அறியும் உரிமை சட்டத்தின் கீழ் புதுவை அமைச்சர்களின் அலுவலகத்தில் எத்தனை பணியாளர்கள் உள்ளனர் என்பதை கேட்டுள்ளார். 2024-ம் ஆண்டு டிசம்பர் மாதம்வரை அலுவலகத்தில் டீ, காபி மற்றும் பூங்கொத்து வாங்கிய செலவுகள், கார் பயன்பாடு, வெளிநாட்டு பயணம் மற்றும் ஸ்மார்ட் சிட்டி திட்டம் தொடர்பான பல்வேறு கேள்விகளை முன்வைத்துள்ளார்.
அமைச்சர்களின் செலவுகள்குறித்து அமைச்சரவை அலுவலக பொதுத் தகவல் அதிகாரியான அமுதன் வழங்கிய தகவலின் அடிப்படையில், ஒவ்வொரு அமைச்சரும் தனித்தனியாக ஒரு கார் பயன்படுத்துகிறார்கள். அமைச்சர்களின் அலுவலகத்தில் ஒவ்வொருவருக்கும் 14 பணியாளர்கள் உள்ளனர். உள்துறை அமைச்சரின் அலுவலகத்தில் காபி மற்றும் டீச்செலவாக ரூ.7,12,635, பொதுப் பணித்துறை அமைச்சருக்கு ரூ.7,81,421, வேளாண்துறை அமைச்சருக்கு ரூ.11,84,320 செலவாக உள்ளன.
பூங்கொத்து வாங்கியதற்காக உள்துறை அமைச்சருக்கு ரூ.22,31,000, பொதுப்பணித்துறை அமைச்சருக்கு ரூ.8,04,955, முன்னாள் குடிமைப் பொருள் வழங்கல் துறை அமைச்சருக்கு ரூ.9,70,700, மற்றும் தற்போதைய குடிமைப் பொருள் வழங்கல் துறை அமைச்சருக்கு ரூ.1,400 செலவிடப்பட்டுள்ளது.
பொதுப்பணித்துறை அமைச்சர் அரசு முறையில் 6 முறை வெளிநாடு சென்றுள்ளார். அமைச்சர்களின் தனிப்பட்ட வெளிநாட்டு பயணங்கள்குறித்து அரசு பதிவேடுகளில் எந்தத் தகவலும் இல்லை. முதலமைச்சர் ரங்கசாமி 3 முறை மட்டுமே அரசு பயணமாக டெல்லி சென்றுள்ளார், ஆனால் வெளிநாட்டிற்கு பயணம் மேற்கொள்ளவில்லை.
அமைச்சர்கள் மாதம் ரூ.20,000 முதல் 80,000 வரை எரிபொருள் தேவைக்காகச் செலவிட்டுள்ளனர்.
