சென்னையில் வங்கிகளில் கோடிக்கணக்கில் கடன் பெற்று மோசடி செய்தது மற்றும் முறைகேடான வழிகளில் சட்டவிரோத பணப் பரிவர்த்தனைகளில் ஈடுபட்டது போன்ற பல்வேறு புகார்கள் அமலாக்கத்துறைக்கு (ED) அடுத்தடுத்து கிடைத்தன. இந்த ரகசியப் புகார்களின் அடிப்படையில், உரிய ஆதாரங்களைத் திரட்டிய மத்திய அமலாக்கத்துறை அதிகாரிகள், இன்று காலை முதலே சென்னையின் முக்கியப் பகுதிகளில் அதிரடி சோதனையைத் தொடங்கியுள்ளனர்.
சென்னையின் முக்கியப் பகுதிகளான அயனாவரம் மற்றும் திருமங்கலம் உள்ளிட்ட 5-க்கும் மேற்பட்ட இடங்களில் இந்தச் சோதனை மிகவும் தீவிரமாக நடைபெற்று வருகிறது. குறிப்பாக, பழைய கார்களை வாங்கி விற்கும் (Used Cars Business) தொழிலில் ஈடுபட்டு வரும் முன்னணிப் பைனான்சியர் ஒருவரின் வீடு, அலுவலகம் மற்றும் அவருக்குத் தொடர்புடைய இடங்களை இலக்கு வைத்து இந்த ரெய்டு நடத்தப்பட்டு வருகிறது.
வங்கிகளில் போலி ஆவணங்களைக் கொடுத்து முறைகேடாகக் கடன் பெற்ற பணத்தை, கார் டீலிங் மற்றும் பைனான்ஸ் தொழிலில் முதலீடு செய்து சட்டவிரோதப் பணப் பரிவர்த்தனையாக மாற்றினாரா என்ற கோணத்தில் அதிகாரிகள் விசாரணையை முடுக்கிவிட்டுள்ளனர்.
சோதனையின் போது பல்வேறு முக்கிய ஆவணங்கள், வங்கிப் கணக்கு விவரங்கள் மற்றும் டிஜிட்டல் ஆதாரங்கள் கைப்பற்றப்பட்டு வருவதாக முதற்கட்டத் தகவல்கள் வெளியாகியுள்ளன. காலை முதலே மத்திய பாதுகாப்புப் படை வீரர்களின் பாதுகாப்புடன் நடைபெற்று வரும் இந்த விடிய விடிய அமலாக்கத்துறை அதிரடி வேட்டை, சென்னை வட்டாரத்தில் பெரும் பரபரப்பை ஏற்படுத்தியுள்ளது.
