சென்னை:
சென்னை எழும்பூர் ரயில் நிலையத்தில் ரயில்வே போலீஸார் நேற்று காலைக் கண்காணிப்புப் பணியில் ஈடுபட்டிருந்தனர். அப்போது, ஆந்திர மாநிலம் காக்கிநாடாவிலிருந்து எழும்பூர் வழியாகப் புதுச்சேரிக்கு இயக்கப்படும் சர்க்கார் விரைவு ரயில் வந்தது. இந்த ரயிலில் பயணிகள் இறங்கிச் சென்றபிறகு, சோதனை நடத்தியபோது, ரயிலின் பொதுப் பெட்டியில் ஒருபை கேட்பாரற்று கிடந்தது.
அந்தப் பையைத் திறந்து பார்த்தபோது, அதில் ரூ.1.20 லட்சம் மதிப்பு கொண்ட 6 கிலோ கஞ்சா பொட்டலங்கள் இருந்தன. அந்தக் கஞ்சா பொட்டலங்களை ரயில்வே போலீஸார் பறிமுதல் செய்தனர். ஆந்திர மாநிலம் விஜயவாடாவிலிருந்து கஞ்சாவையாராவது கடத்தி வந்து இருக்கலாம், போலீஸாரை கண்டதும் பையை வைத்துவிட்டு தப்பியிருக்கலாம் என்றும் போலீஸார் சந்தேகிக்கின்றனர். இது தொடர்பாக வழக்குப்பதிந்து விசாரித்து வருகின்றனர்.
