தமிழகத்தில் உள்ள அரசுப் பள்ளி மாணவர்களுக்கு மதிய உணவுத் திட்டத்தில் அதிரடி மாற்றங்களைக் கொண்டுவரத் த.வெ.க. அரசு திட்டமிட்டுள்ளது. இதன் ஒரு பகுதியாக, மாணவர்களுக்கு மதிய உணவில் வாரம் ஒருமுறை சிக்கன் பிரியாணி வழங்குவது குறித்து தீவிரமாகப் பரிசீலிக்கப்பட்டு வருவதாகப் பள்ளி கல்வித்துறை அமைச்சர் ராஜ் மோகன் தெரிவித்துள்ளார்.
சென்னையில் இன்று நடைபெற்ற ஆசிரியர்கள் மற்றும் ஆசிரியர்கள் அல்லாத பணியாளர் சங்கங்களின் பிரதிநிதிகளுடனான ஆலோசனைக்கூட்டத்தில் அமைச்சர் ராஜ் மோகன் கலந்துகொண்டு பேசினார். அப்போது அவர், மாணவர்களின் ஊட்டச்சத்தை மேம்படுத்தும் நோக்கில் மதிய உணவில் சிக்கன் பிரியாணி வழங்குவது குறித்து ஆலோசிக்கப்பட்டு வருவதாகவும், இது தொடர்பான கருத்துகள் பெறப்பட்டு முதலமைச்சர் ஜோசப் விஜய்யிடம் தெரிவிக்கப்பட்டுள்ளதாகவும் கூறினார். இந்த விவகாரத்தில் முதலமைச்சர் விரைந்து பரிசீலித்து இறுதி முடிவை அறிவிப்பார் என்றும் அவர் தெரிவித்தார்.
தமிழ்நாட்டில் மொத்தம் 37,595 அரசுப் பள்ளிகள் இயங்கி வருவதுடன், இவற்றில் 52 லட்சத்து 75 ஆயிரத்திற்கும் மேற்பட்ட மாணவ-மாணவிகள் கல்வி பயின்று வருகின்றனர். மேலும், 2 லட்சத்து 25 ஆயிரத்திற்கும் அதிகமான ஆசிரியர்களும் பணியாற்றி வருகின்றனர். அரசு மற்றும் உதவிபெறும் பள்ளிகள் எனப் பல்வேறு நிலைகளில் உள்ள இந்த அமைப்பில், மதிய உணவுத் திட்டம் மற்றும் காலை உணவுத் திட்டம் ஆகியவற்றின் மூலமாக மட்டும் தோராயமாக 46 லட்சத்து 7 ஆயிரம் மாணவர்கள் தொடர்ந்து பயனடைந்து வருகின்றனர்.
தற்போது அரசுப் பள்ளி மாணவர்களுக்கு மதிய உணவாக வெஜிடபிள் பிரியாணி, தக்காளி சாதம், எலுமிச்சை சாதம், புளியோதரை உள்ளிட்ட பல்வேறு கலவை சாதங்கள் வழங்கப்பட்டு வருகின்றன. இவற்றுடன் அனைத்து நாட்களிலும் முட்டையும், முட்டை விரும்பாத குழந்தைகளுக்கு மாற்றாக வாழைப்பழமும் வழங்கப்படுவது நடைமுறையில் உள்ளது. இந்தச் சூழலில் தான் மாணவர்களின் விருப்பத்திற்கேற்ப வாரம் ஒருமுறை சிக்கன் பிரியாணி வழங்கும் புதிய திட்டம் பரிசீலனைக்கு வந்துள்ளது.
இந்த அதிரடியான மற்றும் சுவையான திட்டம் குறித்த அதிகாரப்பூர்வ அறிவிப்பு விரைவில் வெளியாகவுள்ள நிலையில், வரும் ஆகஸ்ட் 5 ஆம் தேதி தாக்கல் செய்யப்பட உள்ள தமிழக அரசின் பட்ஜெட்டில் இது தொடர்பான முக்கிய அறிவிப்பு இடம்பெறும் என எதிர்பார்க்கப்படுகிறது.
