பைக் வீலிங் செய்தபோது விபத்தில் சிக்கிய பிரபல யூடியூபர் டிடிஎப் வாசன் படுகாயமடைந்தார்.
சென்னை, பிரபல யூடியூபர் டிடிஎப் வாசன், பைக்கை வேகமாக ஓட்டி இளைஞர்களிடம் பிரபலமானார். தற்போது ‘மஞ்சள் வீரன்’ என்ற படத்தில் கதாநாயகனாக நடித்து வருகிறார்.
இதனிடையே டிடிஎப் வாசன், நேற்று முன் தினம் விலை உயர்ந்த தனது பைக்கில் சென்னையிலிருந்து மராட்டிய மாநிலத்துக்குப் புறப்பட்டுச் சென்றார்.
சென்னை-பெங்களூரு தேசிய நெடுஞ்சாலையில் வேலூர் நோக்கிச் சென்று கொண்டிருந்தபோது, காஞ்சீபுரம் அடுத்த பாலுசெட்டிசத்திரம் பகுதியில் அதிவேகமாகச் சென்ற அவர், முன்னால் சென்ற காரை முந்திச்செல்ல முயன்று தனது பைக்கில் ‘வீலீங்’ செய்தார்.
அப்போது கட்டுப்பாட்டை இழந்த பைக் சாலையோர தடுப்பில் மோதியது. இதில் டிடிஎப் வாசன் பைக்கிலிருந்து தூக்கி வீசப்பட்டு கீழே விழுந்தார்.
இதில் படுகாயமடைந்த டிடிஎப் வாசனை அந்த வழியாகச் சென்றவர்கள் மீட்டு காஞ்சீபுரம் அருகில் உள்ள மருத்துவ கல்லூரி மருத்துவமனைக்கு அனுப்பி வைத்தனர். பைக்கிலிருந்து தூக்கி வீசப்பட்ட போதிலும் அவர் பாதுகாப்பு கவச உடை அணிந்திருந்ததால் உயிர் தப்பினார். எனினும் அவருக்குக் கைப்பகுதியில் எலும்பு முறிவு ஏற்பட்டது. அதற்கு முதலுதவி சிகிச்சை அளிக்கப்பட்டது. பின்னர் மேல் சிகிச்சைக்காகச் சென்னை ஆஸ்பத்திரிக்கு அனுப்பி வைக்கப்பட்டார்.
இதுகுறித்து விசாரணை மேற்கொண்ட காஞ்சிபுரம் பாலுசெட்டி சத்திரம் போலீசார், டிடிஎப் வாசன் மீது வாகனத்தை அஜாக்கிரதையாக ஓட்டுதல், பிறர் பாதுகாப்புக்கு குந்தகம் விளைவித்தல் உள்பட 4 பிரிவுகளில் வழக்குப்பதிவு செய்தனர்.
மேலும், டிடிஎப் வாசன் வாசனின் ஓட்டுநர் உரிமத்தையும் ரத்து செய்யத் தமிழ்நாடு போக்குவரத்து துறைக்குப் போலீசார் பரிந்துரை செய்தனர். இதனைத் தொடர்ந்து டிடிஎப் வாசனின் ஓட்டுநர் உரிமத்தை ரத்து செய்யத் தமிழ்நாடு போக்குவரத்து துறை ஆணையரகம் பரிந்துரை செய்துள்ளது.
இந்நிலையில், பைக்கில் வீலிங் செய்து விபத்தில் சிக்கிய டிடிஎப் வாசனை காஞ்சிபுரம் போலீசார் இன்று கைது செய்தனர். கைது செய்யப்பட்ட டிடிஎப் வாசனிடம் போலீசார் விசாரணை நடத்தி வருகின்றனர்.
