கரூர்:
ஜெர்மனி நாட்டின் பிராங்பர்ட் நகரில் உலகின் மிகப்பெரிய ஜவுளிக் கண்காட்சி நேற்று முன்தினம் தொடங்கியது. இதில், இந்திய நிறுவனங்கள் பங்கேற்ற கூடத்தை மத்திய அமைச்சர் கிரிராஜ்சிங் தொடங்கிவைத்தார்.
இந்தக் கண்காட்சியில் 60 நாடுகளிலிருந்து 2,900 ஜவுளி உற்பத்தி நிறுவனங்கள் மற்றும் மொத்த விற்பனையாளர்கள் பங்கேற்று, தங்களது பொருட்களைக் காட்சிப்படுத்தியுள்ளனர்.
இந்தியாவில் பானிபட்டிலிருந்து 158, கரூரிலிருந்து 67 உட்பட 330 ஜவுளி உற்பத்தி நிறுவனங்கள் தங்களது பொருட்களைக் காட்சிப்படுத்தியுள்ளன.
இந்திய ஜவுளித் துறை, ஏற்றுமதி வளர்ச்சிக் கழகம் ஆகியவை, இந்தக் கண்காட்சியில் பங்குபெற இந்திய ஜவுளி உற்பத்தியாளர்களுக்கு உதவிபுரிகின்றன. கரூர் ஜவுளி ஏற்றுமதி நிறுவனங்கள் ஆண்டுக்கு ரூ.6,500 கோடிக்கு ஏற்றுமதி செய்கின்றன.
இந்தக் கண்காட்சிமூலம் ரூ.3,000 கோடி அளவுக்கு ஏற்றுமதி ஆணைகள் கிடைக்கும் என்று எதிர்பார்ப்பதாகக் கரூர் ஜவுளி உற்பத்தியாளர்கள் மற்றும் ஏற்றுமதியாளர்கள் சங்கத் தலைவரும், இந்திய ஏற்றுமதிகள் நிறுவனக் கூட்டமைப்பின் மண்டலத் தலைவருமான பி.கோபாலகிருஷ்ணன் தெரிவித்துள்ளார்.
