கோவையில் தனியார் கல்லூரி மாணவர்கள் 7 பேர் 17 வயது சிறுமியை விடுதி அறைக்கு அழைத்து, கூட்டுப் பாலியல் வன்கொடுமை செய்ததாகத் தகவல் வெளியாகியுள்ளது. இதுகுறித்து போலீசார் விசாரணை மேற்கொண்டு உள்ளனர்.
இந்த நிலையில், தமிழ்நாட்டில் பெண் குழந்தைகளுக்கான பாதுகாப்பு குறைவாகி வருவதும், காவல்துறையால் இதற்கான நடவடிக்கைகள் எடுக்கப்படாததும் கடுமையாகக் கண்டிக்கப்பட வேண்டியதாகும் எனப் பாமக தலைவர் அன்புமணி ராமதாஸ் தெரிவித்துள்ளார்.
அவர் வெளியிட்டுள்ள அறிக்கையில், கோவையில் தனியார் கல்லூரி மாணவர்கள் 7 பேர் 17 வயது சிறுமியை விடுதி அறைக்கு அழைத்து, கூட்டுப் பாலியல் வன்கொடுமை செய்திருப்பது அதிர்ச்சியளிக்கிறது. தமிழ்நாட்டில் பெண் குழந்தைகளுக்கான பாதுகாப்பு குறைவாகி வருவது மிகவும் கவலையளிக்கிறது.
தமிழ்நாட்டின் அனைத்து பகுதிகளிலும் கஞ்சா வணிகம் தடையின்றி நடைபெற்று வருகிறது. கஞ்சா மற்றும் பிற போதைப் பொருட்களுக்கு அடிமையாகிய இளைய தலைமுறை, கொடூரமான குற்றங்களை எந்தவித உணர்வும் இல்லாமல் சாதாரணமாகச் செய்கின்றனர். இதற்கிடையில், தமிழ்நாட்டில் எந்தக் குற்றங்களையும் செய்துவிட்டு தண்டனை இல்லாமல் தப்பிக்க முடியும் என்ற நிலை உருவாகியுள்ளது. இந்தச் சூழ்நிலை, பெண்களுக்கு எதிரான குற்றங்கள் அதிகரிக்க காரணமாக உள்ளது. தமிழக அரசு மற்றும் காவல்துறையின் தோல்வி இந்தக் கொடிய நிகழ்வுகளை வெளிப்படுத்துகிறது.
கஞ்சா மற்றும் பிற போதைப் பொருட்களின் பரவலால் குற்றங்கள் அதிகரிக்கின்றன என்பதால், அதன் பரவலை கட்டுப்படுத்த கடுமையான நடவடிக்கைகள் எடுக்கப்பட வேண்டும்.
