ரஷியாவுக்கு 12 ஆயிரம் ராணுவ வீரர்களை வடகொரியா அனுப்பியுள்ளதாகத் தென்கொரியா உளவு அமைப்பு தெரிவித்துள்ளது.
பியாங்யாங்:வடகொரியாவுக்கும் தென்கொரியாவுக்கும் எப்போதும் ஏழாம் பொருத்தம்தான். தென்கொரியாவுடன் கடும் மோதல் போக்கைக் கடைபிடித்து வரும் வடகொரியா அவ்வப்போது ஏவுகணை சோதனைகளை நடத்தி கொரிய பிராந்தியத்தை பதற்றத்தில் வைத்துள்ளது.
தென்கொரியாவுக்கு அமெரிக்கா ஆதரவு அளிப்பதால் அமெரிக்காவுடன் மோதல் போக்குடன் வடகொரியா செயல்பட்டு வருகிறது. இதனால், வடகொரியாவுக்கு எதிராகப் பல்வேறு பொருளாதார தடைகளை அமெரிக்கா விதித்துள்ளது. இதனால், பொருளாதார பாதிப்பைச் சந்தித்து இருக்கும் வடகொரியாவுக்கு ரஷியா , சீனா உள்ளிட்ட நாடுகள் ஆதரவு அளிக்கின்றன.
இதற்குக் கைமாறாக ரஷியாவுடன் மிகவும் இணக்கமாக வடகொரியா செயல்பட்டு வருகிறது. இந்த நிலையில், உக்ரைனுக்கு எதிரான போரில் ரஷியாவுக்கு உதவும் விதமாகத் தங்கள் நாட்டு ராணுவ வீரர்கள் 12 ஆயிரம் பேரை வடகொரியா அனுப்பியிருப்பதை தென்கொரிய உளவு அமைப்பு கண்டறிந்துள்ளது. உக்ரைன் -ரஷியா இடையே 2 ஆண்டுகளுக்கும் மேலாகப் போர் நீடித்து வருவது குறிப்பிடத்தக்கது.