தனுஷுக்கு எதிரான நெட் பிளிக்சின் மனு தள்ளுபடி!

நடிகை நயன்தாராவின் திருமண ஆவணப்படம் நெட்ஃபிளிக்ஸ் ஓடிடியில் ‘Nayanthara: Beyond the Fairy Tale’ என்ற பெயரில் வெளியானது.

இந்த ஆவணப்படத்தில் தனுஷ் தயாரித்த ‘நானும் ரவுடி தான்’ படத்தின் காட்சிகள் பயன்படுத்தியதாகக் கூறி, ரூ.10 கோடி இழப்பீடு கேட்டு நடிகர் தனுஷின் வொண்டர் பார் நிறுவனம் சென்னை உயர்நீதிமன்றத்தில் வழக்கு தொடர்ந்தது.

இந்த வழக்கு தொடர்பான விசாரணை கடந்த வாரம் சென்னை உயர்நீதிமன்றத்தில் நடைபெற்றபோது நெட்ஃபிளிக்ஸ் நிறுவனம் தரப்பில், “திரைப்படத்தில் இடம்பெறாத படப்பிடிப்பு காட்சிகளுக்கு வொண்டர்பார் நிறுவனம் பதிப்புரிமை கோர முடியாது.

படப்பிடிப்பு காட்சிகள் 2020-ம் ஆண்டே வெளியான போதும், தாமதமாக 2024-ம் ஆண்டுதான் வழக்கு தொடரப்பட்டுள்ளது. படத்தில் பயன்படுத்தப்பட்ட அந்தக் காட்சிகள் படப்பிடிப்பு தளத்தில் எடுக்கப்பட்டது” எனத் தெரிவிக்கப்பட்டது.

இதற்குத் தனுஷின் வொண்டர்பார் தரப்பில் ஆஜரான மூத்த வழக்கறிஞர் பி எஸ் ராமன், நானும் ரவுடிதான் படத்தில் பயன்படுத்தப்பட்ட காட்சியில் உள்ள அனைத்தும் தனக்கு சொந்தம் என்றும், ஆவணப்படத்தின் டிரெய்லர் வெளியிட்டபோது,

3 வினாடி காட்சிகள் பயன்படுத்தப்பட்டுள்ளது தெரியவந்த உடனேயே அந்தக் காட்சிகள் பயன்படுத்துவதைத் தவிர்க்கக் கூறியபோது, அதற்கு நயன்தாரா தரப்பில், வெளிப்படையாகப் பதிப்புரிமைக்காக நீதிமன்றத்தில் பார்த்துக் கொள்ளுங்கள் என்று பொதுவெளியில் கடிதம் எழுதினார் என்று வாதிட்டார்.

படத்தின் ஒப்பந்தம் கையெழுத்தானபோது வொண்டர்பார் நிறுவன அலுவலகம் வீனஸ் காலனியில் இருந்ததாகவும், அதனால் சென்னை உயர் நீதிமன்றத்தில் வழக்கு தொடர முடியும் எனவும் வொண்டர்பார் நிறுவனம் தரப்பில் வாதிடப்பட்டது.

படத்தில் பயன்படுத்தப்பட்ட அந்தக் காட்சிகள் படப்பிடிப்பு தளத்தில் எடுக்கப்பட்டது என்றும், நயன்தாரா ஒப்பந்தம் செய்யும்போது அவர் செய்துள்ள சிகை அலங்காரம், உடை அலங்காரத்திலிருந்து அனைத்தும் நிறுவனத்திற்கே சொந்தமானது என ஒப்புக்கொண்டு கையெழுத்திட்டதாகச் சுட்டி காட்டினார்.

படம் தொடர்பாக அனைத்து காட்சிகளும் வொண்டர்பாருக்கு சொந்தமானது என்பதால், இது காப்புரிமை சட்டத்திற்கு பொருந்தும் எனவும், படத்தின் படப்பிடிப்பு பெரும்பாலும் சென்னையில் தான் நடைபெற்றது எனவும் வாதிட்டார்.

அனைத்து தரப்பு வாதங்களும் நிறைவடைந்த நிலையில், இந்த வழக்கில் இன்று உத்தரவு பிறப்பித்த நீதிபதி அப்துல் குத்தூஸ், வொண்டர்பார் நிறுவனத்தின் வழக்கை நிராகரிக்க வேண்டும் என நெட்பிலிக்ஸ் தாக்கல் செய்த வழக்கைத் தள்ளுபடி செய்து உத்தரவிட்டார்.

மேலும், வொண்டர்பார் நிறுவனத்தின் தரப்பில் தனுஷ் தாக்கல் செய்த உரிமையியல் வழக்கின் விசாரணையைப் பிப்ரவரி 5ம் தேதிக்குத் தள்ளி வைத்தார்.