சென்னை:
சென்னை மாநகராட்சியின் 51 சமுதாய கூடங்களை வாடகைக்கு எடுக்க, புரோக்கர்களை நாடும் நிலை தொடர்ந்து நீடிக்கிறது. ஆன்லைனில் முன்பதிவு செய்தாலும், புரோக்கர்கள் உதவியின்றி சமுதாயக் கூடத்தில் இந்த நிகழ்ச்சியும் நடத்த முடியாது என்ற நிலை உள்ளது.
சென்னை மாநகராட்சிக்குச் சொந்தமாக 51 சமுதாய கூடங்கள் உள்ளன. இவற்றில் குடும்ப விழாக்கள் போன்ற நிகழ்ச்சிகள் நடத்திக் கொள்ள விரும்பும் பொதுமக்கள், ஆன்லைனில் முன்பதிவு செய்து கொள்ளலாம். வாடகையும் மிகக் குறைவு என்பதால் பொதுமக்கள் பலரும் விரும்புகின்றனர். ஆனால் உண்மை நிலவரம் வேறு மாதிரியாக இருப்பதாகப் பாதிக்கப்பட்டோர் புகார் கூறுகின்றனர்.
குடியிருப்பாளர்கள் அழைப்பதற்காக உதவி பொறியாளர்களின் மொபைல் எண்களை மாநகராட்சி வெளியிட்டுள்ளது. இது வெறும் கண்துடைப்பு மட்டுமே. அங்கு நேரில் சென்றால் மட்டுமே, புரோக்கர்கள் யார், அவர்களது அதிகாரம், செல்வாக்கு என்ன என்பதை அறிய முடியும்.
குறிப்பாக, மாதவரம், மணலி, கே.கே. நகர் மற்றும் சி.ஐ.டி., நகர் ஆகிய இடங்களில் உள்ள நான்கு சமுதாயக் கூடங்களுக்கு முன்பதிவு செய்யப் புரோக்கர்களுக்கு கட்டாயமாகப் பணம் கொடுக்கும் நிலை நிலவுகிறது என்கின்றனர் பாதிக்கப்பட்ட மக்கள்.
சமுதாய கூடத்தை ஆன்லைனில் பதிவு செய்ய முயன்று பாதிக்கப்பட்ட ஒருவர் கூறியது, நாங்கள் முன்பதிவு செய்யச் சென்றபோது, ஆளும் கட்சியினர், உள்ளூர் கவுன்சிலரின் ஆட்கள் என்று கூறிக்கொண்டு, சிலர் வருகிறார்கள். நான் அரை நாள் முன்பதிவு செய்ய விரும்பினேன். அதற்கு வாடகை ரூ.1,700, ஆனால் அவர்கள் அவ்வாறு செய்யக் கூடாது. முழு நாட்கள் புக் செய்யக் கட்டாயப்படுத்துகிறார்கள். இதற்கு வாடகை ரூ.3700.
75 பேர் அமரும் வகையில் அறை கேட்டால், அவர்கள் 300 பேர் அமரும் அறையை ஏற்பாடு செய்கிறார்கள். அவர்கள் தரப்பில் தொடர்பில் உள்ள கேட்டரிங்கில் உணவு ஆர்டர் செய்யக் கட்டாயப்படுத்துகிறார்கள். இங்கு மற்ற இடங்களைவிட விலை அதிகமாக இருக்கிறது.
எனக்கு மிகக்குறைந்த எண்ணிக்கையிலான சேர் மட்டுமே தேவைப்பட்டது. ஆனால் புரோக்கர்கள் அதிக எண்ணிக்கையில் சேர்களை நீங்கள் கட்டாயம் வாங்கிக் கொள்ள வேண்டும் என்று வற்புறுத்துகின்றனர். இப்படி ஒவ்வொன்றும் தேவையில்லாததை வாங்கச் சொல்லிக் கூடுதல் செலவு இழுத்து விடுவதால், பலரும் மாநகராட்சி சமுதாய கூடங்களுக்குச் செல்ல விரும்பவில்லை என்றார்.
பணம் வசூலிக்க யாருக்கும் அதிகாரம் தரப்படவில்லை. ஆன்லைன் போர்ட்டல் தொடங்கப்பட்டதிலிருந்து, 51 அரங்குகளுக்கு ஒரு நாளைக்கு குறைந்தது 50க்கும் மேற்பட்டோர் ஆன்லைனில் புக்கிங் செய்கிறார்கள். இவ்வாறு அவர்கள் கூறினர்.
இத்தகைய அராஜகத்தால், மாநகராட்சி சமுதாயக் கூடங்களுக்கு நியாயமாக வரவேண்டிய வருவாய் கூட வருவதில்லை என்கின்றனர் விபரம் அறிந்தவர்கள்.
