டெல்லியில் நாளை (ஜூன் 11) நடைபெறவுள்ள நிதி ஆயோக் கூட்டத்தில் பங்கேற்பதற்காக, தமிழக முதலமைச்சர் விஜய் இன்று காலை சென்னையிலிருந்து தனி விமானம் மூலம் டெல்லிக்குப் புறப்பட்டுச் சென்றார். பிரதமரின் தலைமையில் நடைபெறவுள்ள இந்த முக்கியக் கூட்டத்தில் பங்கேற்பதற்காக அவர் மேற்கொண்டுள்ள இரண்டாவது டெல்லி பயணம் இதுவாகும்.
நிதி ஆயோக் ஆளுநர் குழுவின் 11-வது கூட்டத்தில், நாட்டின் அனைத்து மாநில முதலமைச்சர்களும், யூனியன் பிரதேசங்களின் துணை நிலை ஆளுநர்களும் பங்கேற்கின்றனர். இந்தக் கூட்டத்தில், தமிழகத்தின் பல்வேறு வளர்ச்சித் திட்டங்கள் மற்றும் மாநிலத்தின் முக்கியக் கோரிக்கைகளை மத்திய அரசிடம் முதலமைச்சர் விஜய் வலுவாக எடுத்துரைப்பார் என்று எதிர்பார்க்கப்படுகிறது. மாநிலத்தின் நலனுக்காகத் தேவையான நிதி ஒதுக்கீடு மற்றும் புதிய திட்டங்கள் குறித்தும் அவர் விரிவாகப் பேசுவார் எனத் தெரிகிறது.
தனது மூன்று நாள் பயணத்தின் ஒரு பகுதியாக, குடியரசுத் தலைவர் திரௌபதி முர்மு மற்றும் துணை குடியரசுத் தலைவர் சி.பி. ராதாகிருஷ்ணன் ஆகியோரையும் முதலமைச்சர் விஜய் சந்தித்துப் பேசத் திட்டமிட்டுள்ளார். மேலும், மத்திய உள்துறை அமைச்சர் அமித் ஷா மற்றும் காங்கிரஸ் கட்சியின் மூத்த தலைவர்களான சோனியா காந்தி, ராகுல் காந்தி உள்ளிட்ட முக்கிய அரசியல் தலைவர்களையும் அவர் சந்திக்கக்கூடும் எனத் தகவல்கள் தெரிவிக்கின்றன.
முதலமைச்சருடன் தமிழக தலைமைச் செயலாளர் எம். சைகுமார் உள்ளிட்ட உயர்மட்ட அதிகாரிகளும் டெல்லி சென்றுள்ளனர். பல்வேறு அரசு மற்றும் அரசியல் தொடர்பான ஆலோசனைகளை முடித்துக்கொண்டு, முதலமைச்சர் விஜய் வரும் 12-ஆம் தேதி (வெள்ளிக்கிழமை) மாலை சென்னை திரும்புவார் என எதிர்பார்க்கப்படுகிறது.
