அஷ்டவக்கிராசனம்!
வடமொழியில் ‘அஷ்ட’ என்றால் ‘எட்டு’ என்றும், ‘வக்கிரம்’ என்றால் ‘முறுக்குதல்’ என்றும் பொருள். இவ்வாசனம் அஷ்டவக்கிரர் என்ற முனிவரின் பெயரையொட்டி அஷ்டவக்கிராசனம் என்று அழைக்கப்படுகிறது. இது ஆங்கிலத்தில் Eight Angle Pose என்று அழைக்கப்படுகிறது.
அஷ்டவக்கிராசனம் கையால் உடலைத் தாங்கும் அருமையான ஆசனம். இவ்வாசனம் உடல் முழுவதிலும் ஆற்றலைப் பெருக்குகிறது. அஷ்டவக்கிராசனத்தில் மணிப்பூரக சக்கரம் தூண்டப்படுகிறது. பிரபஞ்ச ஆற்றலைக் கவரும் தன்மை கொண்ட இவ்வாசனத்தைத் தொடர்ந்து பயிலும்போது உடலின் சமநிலை அதிகரிக்கிறது.
அஷ்டவக்கிராசனத்தின் பலன்கள்:
உடலை நீட்சியடையச் செய்கிறது.முதுகுத்தண்டை நீட்சியடையச் செய்கிறது.தோள், கைகளை மற்றும் மணிக்கட்டைப் பலப்படுத்துகிறது.முதுகுத் தசைகளைப் பலப்படுத்துகிறது.வயிற்று உள்உறுப்புகளின் செயல்பாடுகளை மேம்படுத்துகிறது.இரத்த ஓட்டத்தை மேம்படுத்துகிறது.கவனத்தைக் கூர்மையாக்குகிறது.தன்னம்பிக்கையை வளர்க்கிறது.
செய்முறை:
தாடாசனத்தில் நிற்கவும்.கால்களுக்கிடையில் சற்று இடைவெளி விட்டு நிற்கவும்.மூச்சை வெளியேற்றியவாறு முன்னால் குனிந்து கைகளைப் பாதங்களுக்கு அருகில் வைக்கவும். இது உத்தானாசன நிலை.கால் முட்டிகளைச்சற்றுமடக்கி, வலது கையைக் கால்களுக்கு இடையில் நுழைத்து வலது காலின் பின்னால் தரையில் வைக்கவும். வலது கால் முட்டியை வலது தோள்மீது வைக்கவும். இடது காலை வலது புறமாக நீட்டி இரண்டு கணுக்கால்களையும் பிணைக்கவும்.
சற்றே இடது புறம் சாய்ந்து பாதங்களைத்தரையிலிருந்து உயர்த்தவும். மூச்சை வெளியேற்றிய வாறு கைமுட்டிகளை மடக்கவும். மேல் உடலை முன்புறமாகச் சாய்க்கவும். மேல் உடல் நேர்க்கோட்டில் இருக்க வேண்டும். கால்களை வலதுபுறமாக நன்றாக நீட்டவும். உங்கள் வலது கையின் மேல்பகுதி இரண்டு தொடைகளுக்கு இடையில் இருக்குமாறு நீட்டவும்.ஒரு நிமிடம் இந்நிலையில் இருக்கவும்.ஆரம்ப நிலைக்கு வந்து கால்களை மாற்றி மீண்டும் செய்யவும்.
குறிப்பு:
தோள், மணிக்கட்டு, முதுகு மற்றும் இடுப்புப் பகுதியில் தீவிர வலி உள்ளவர்கள் அஷ்டவக்கிராசனத்தைத் தவிர்க்கவும்.
