யூரோ கோப்பை கால்பந்து தொடரின் முதல் போட்டியில் ஜெர்மனி 5-1 என்ற கோல் கணக்கில் ஸ்காட்லாந்து அணியை வீழ்த்திப் புதிய சரித்திரம் படைத்துள்ளது.
யூரோ கோப்பை கால்பந்து தொடரானது ஜெர்மனியில் நேற்று தொடங்கி நடைபெற்று வருகிறது. இந்தத் தொடரை ஜெர்மனி நடத்துகிறது. மொத்ஹம் 24 அணிகள் இடம் பெற்ற இந்தத் தொடரின் முதல் போட்டியில் ஜெர்மனி மற்றும் ஸ்காட்லாந்து அணிகள் மோதின. இந்தப் போட்டியில் ஆரம்பம் முதலே ஜெர்மனி அதிரடியாக விளையாடி அடுத்தடுத்து கோல் அடித்தது.
முதல் பாதி ஆட்டத்தில் ஜெர்மனி 3 கோல் அடித்து முன்னிலை பெற்றது. இதே போன்று 2ஆவது பாதி ஆட்டத்திலும் 2 கோல் அடித்து ஸ்காட்லாந்து அணியைக் கதற வைத்தது. போட்டியின் 10ஆவது நிமிடத்தில் ஜெர்மனி வீரர் ஃப்ளோரியான் விட்ஸ் முதல் கோல் அடித்தார். இதே போன்று 19ஆவது நிமிடத்தில் ஜமால் மூஸியலா 2ஆவது கோல் அடித்தார்.
44ஆவது நிமிடத்தில் ஜெர்மனி வீரர் 3ஆவது கோல் அடித்தார். ஆனால், ஸ்காட்லாந்து அடுத்தடுத்து வீரர்களை ரெட் கார்டு மூலமாக இழந்து குறைவான வீரர்களை வைத்து விளையாடியது. போட்டியின் 68ஆவது நிமிடத்தில் ஜெர்மனி வீரர் 4ஆவது கோல் அடித்தார்.
கடைசியாகப் போட்டியின் 87ஆவது நிமிடத்தில் ஸ்காட்லாந்து தனது முதல் கோல் அடித்தது. இறுதியாகப் போட்டி நேரம் முடிந்ததைத் தொடர்ந்து கூடுதல் நேரம் அளிக்கப்பட்டது. அதில் ஜெர்மனி வீரர் 5ஆவது கோல் அடிக்கவே, 5-1 என்ற கோல் கணக்கில் ஜெர்மனி வெற்றி வாகை சூடியது. இதற்கு முன்னதாகக் கடந்த 2018 மற்றும் 2022 ஆம் ஆண்டுகளில் நடைபெற்ற கால்பந்து உலகக் கோப்பை தொடர்களில் குரூப் சுற்று பிரிவுகளுடன் ஜெர்மனி வெளியேறியது என்பது குறிப்பிடத்தக்கது.
