சென்னை:
சென்னை எழும்பூரில் உள்ள தனியார் பள்ளியைச் சேர்ந்த ஆசிரியர்களைப் பஞ்சாப், காஷ்மீர் உட்பட பல்வேறு பகுதிகளுக்குக் குறைந்த கட்டணத்தில் இன்ப சுற்றுலா அழைத்துச் செல்வதாக டிராவல்ஸ் நிறுவனம் நடத்தி வரும் ஆழ்வார்பேட்டை, கஸ்தூரி ரங்கன் சாலை பகுதியில் வசிக்கும் பாலாஜி (48) என்பவர் ஆசை வார்த்தை கூறியுள்ளார்.
இதை உண்மையென நம்பிய ஆசிரியர்கள் பலர் ஒன்றிணைந்து 3 தவணைகளாகச் சுமார் ரூ.19 லட்சம் கொடுத்துள்ளனர். இந்த ஆண்டு ஏப்ரல் மாதம் சுற்றுலா அழைத்துச் செல்வதாகத் திட்டமிடப்பட்டிருந்தது. ஆனால், பணத்தை பெற்றுக் கொண்ட பாலாஜி, சுற்றுலா அழைத்துச் செல்லாமல் காலம் தாழ்த்தி உள்ளார்.
அதிர்ச்சி அடைந்த சம்பந்தப்பட்ட தனியார் பள்ளி முதல்வர் இதுகுறித்து எழும்பூர் காவல் நிலையத்தில் புகார் அளித்தார். இது தொடர்பாகப் போலீஸார் வழக்குப் பதிந்து விசாரித்தனர். இதில், பள்ளி ஆசிரியர்கள், அலுவலர்கள் என 50 பேரை 7 நாள் சுற்றுலா அழைத்துச் செல்வதாகப் பண மோசடி நடைபெற்றிருப்பது உறுதி செய்யப்பட்டது. இதையடுத்து பண மோசடியில் ஈடுபட்டதாகப் பாலாஜியை போலீஸார் நேற்று முன்தினம் கைது செய்தனர், மேலும், இதுபற்றித் தொடர்ந்து விசாரணை நடைபெறுகிறது.