மகன் மனோஜ் மறைவு- தமிழக அரசியல் கட்சித் தலைவர்கள் இரங்கல்!

இயக்குநர் பாரதிராஜாவின் மகன் மனோஜ் மறைவுக்குத், தமிழக அரசியல் கட்சித் தலைவர்கள் இரங்கல் தெரிவித்துள்ளனர்.

முதலமைச்சர் மு.க.ஸ்டாலின்:

முதலமைச்சர் மு.க.ஸ்டாலின் விடுத்துள்ள இரங்கல் செய்தியில், பல திரைப்படங்களில் நடித்துத் தனக்கென அடையாளத்தை உருவாக்கிக் கொண்டவர் மனோஜ் என்றும், அவர் இயக்கம் உள்ளிட்ட துறைகளிலும் முயன்று பார்த்தவர் என்றும் குறிப்பிட்டுள்ளார்.
இளம் வயதில் அவர் எதிர்பாராதவிதமாக மறைந்துவிட்டது மிகுந்த அதிர்ச்சியளிப்பதாகத் தெரிவித்துள்ளார். அன்பு மகனை இழந்து வாடும் பாரதிராஜாவுக்கும், அவரது குடும்பத்தினருக்கும் இரங்கலைத் தெரிவித்துள்ளார்.

எடப்பாடி பழனிச்சாமி :

அதிமுக பொதுச்செயலாளர் எடப்பாடி பழனிச்சாமி விடுத்துள்ள இரங்கல் செய்தியில், மகனை இழந்து ஆற்றொண்ணாத் துயரில் வாடும் பாரதிராஜா இத்துன்பத்தில் இருந்து மீண்டு வரும் வலிமையை அவருக்கு அளிக்க இறைவனை வேண்டுவதாகக் குறிப்பிட்டுள்ளார்.  பாரதிராஜாவுக்கும் அவரது குடும்பத்தினருக்கும் தனது ஆழ்ந்த இரங்கலையும் வருத்தத்தங்களையும் தெரிவித்துள்ளார்.

அண்ணாமலை :
தமிழக பாஜக தலைவர் அண்ணாமலை விடுத்துள்ள செய்தியில், மனோஜ் உடல் நலக்குறைவால் காலமானார் என்ற செய்தி மிகுந்த வருத்தமளிப்பதாகக் குறிப்பிட்டுள்ளார். பாரதிராஜாவுக்கும், அவரது குடும்பத்தினருக்கும் ஆழ்ந்த இரங்கல்களைத் தெரிவித்துள்ளார்.

அன்புமணி:
பாமக தலைவர் அன்புமணி விடுத்துள்ள இரங்கல் செய்தியில், திரையுலகில் சாதனைகளைப் படைத்திருக்க வேண்டிய  மனோஜ் இளம் வயதில்  இவ்வுலகை விட்டுப் பிரிந்திருப்பதை ஏற்றுக்கொள்ள முடியவில்லை என்று குறிப்பிட்டுள்ளார்.
மகனை இழந்து வாடும் இயக்குநர் பாரதிராஜாவுக்கும்,  அவரது குடும்பத்தினருக்கும் இரங்கலைத் தெரிவித்துள்ளார்.