கடந்த ஆண்டு செப்டம்பர் 27-ஆம் தேதி, தமிழக அரசியல் வரலாற்றிலேயே மறக்க முடியாத ஒரு கருப்பு நாளாக கரூரில் பதிவானது. தமிழக வெற்றிக் கழகத்தின் பிரச்சாரப் பயணத்தின் போது ஏற்பட்ட கடுமையான கூட்ட நெரிசலில் சிக்கி, 41 அப்பாவி உயிர்கள் பறிபோயின.இந்த உயிர்கள் பறிபோன குடும்பங்களுக்கு தற்பொழுது இழப்பீடாக அரசு வேலை தருவதாக முதல்வர் விஜய் கூறி இருந்தார் …இதற்கு பல்வேறு கட்சிகள் அவர்களுடைய எதிர்ப்பையும் தெரிவித்தன…அதனை எல்லாம் மீறி தற்பொழுது பாதிக்கபட்ட குடும்பங்களுக்கு அரசு வேலை என்பது உறுதியாகி உள்ளது… இந்நிலையில் , தற்பொழுது “கரூர் கூட்ட நெரிசல் தந்த ஆறாத வடு, திமுக-வின் ஊழல் முகமூடிகள், மற்றும் இடைத்தேர்தல் களம், ‘வாய் இருந்தால் என்ன வேண்டுமானாலும் பேசுவீர்களா?’ என்று கரூரின் மேடையில் முதல்வர் விஜய் வீசிய கேள்விகணைகள், தமிழக அரசியலின் அடித்தளத்தையே அதிரவைத்துள்ளன. சதித் திட்டங்களைச் சிதைக்கவும், தீய சக்திகளுக்கு நிரந்தரப் பதிலடி கொடுக்கவும் தயாராகியுள்ள தவெக-வின் அதிரடிப் பிரச்சாரம் கரூரில் இருந்து இன்று விஸ்வரூபம் எடுத்துள்ளது.” இது பற்றிய விரிவான செய்தியை தற்பொழுது பார்க்கலாம்..!
கரூரில் நடைபெற்ற அரசு விழாவில், கூட்ட நெரிசலில் சிக்கி உயிரிழந்தவர்களின் குடும்பத்தினருக்குத் தற்காலிக அரசுப் பணி ஆணைகளை வழங்கிப் பேசிய தமிழக முதலமைச்சர் விஜய், தமிழக அரசியல் களத்தில் பெரும் புயலைக் கிளப்பும் வகையில் மிக நீண்ட, விரிவான அரசியல் உரையைக் கூட்டத்தினரிடையே ஆற்றினார். தன் நெஞ்சில் தேங்கிக் கிடந்த வேதனையையும் ஆவேசத்தையும் வார்த்தைகளாகக் கொட்டிய அவர், வரவிருக்கும் இடைத்தேர்தலுக்கான தவெகவின் தேர்தல் பிரச்சாரத்தை இந்த மேடையில் இருந்தே அதிகாரப்பூர்வமாகத் தொடங்கி வைத்தார்.
கரூர் கூட்ட நெரிசல் சம்பவம் என்பது தன் வாழ்நாளில் மறக்க முடியாத, எவ்வளவு பெரிய நிலைக்குச் சென்றாலும் ஆறாத ஒரு மாபெரும் வடு என்று குறிப்பிட்ட முதலமைச்சர் விஜய், இந்தச் சம்பவத்தின் பின்னணியில் உள்ள காவல்துறை மற்றும் முந்தைய அதிகார வர்க்கத்தின் நாடகங்களை அக்குவேறு ஆணிவேறாக அம்பலப்படுத்தினார். இதற்கு முன்பாகத் தங்களுக்குப் பெரம்பலூரில் பொதுக்கூட்டம் ஏற்பாடு செய்யப்பட்டிருந்த போது, அங்கு கூட்டம் அதிகமாகக் கூடிவிட்டது என்று காவல்துறை எச்சரித்ததால், மக்களின் பாதுகாப்பைக் கருதி மனவலியோடு தாங்கள் அந்தப் பயணத்தைத் தவிர்த்துவிட்டுத் திரும்பியதை அவர் நினைவு கூர்ந்தார்.
ஆனால், அதே போன்றதொரு முன்னெச்சரிக்கையைக் கரூரில் காவல்துறை ஏன் தங்களுக்கு வழங்கவில்லை என்று கேள்வி எழுப்பிய அவர், காவல்துறையினர் நினைத்திருந்தால் அன்றைய கரூர் கூட்டத்தை எளிதாக ரத்து செய்திருக்க முடியும் அல்லது தடுத்து நிறுத்தியிருக்க முடியும் என்றார். அவ்வாறு செய்யாமல், கரூர் நெடுஞ்சாலையிலிருந்து மக்கள் கூட்டத்தைத் தாங்களாகவே பாதுகாப்பு கொடுத்து உள்ளே அழைத்து வந்துவிட்டு, பின்னர் அசம்பாவிதம் நடந்தவுடன் அந்தப் பழியை ஒட்டுமொத்தமாகத் தன் மீதும் தன் இயக்கத்தின் மீதும் தூக்கிப் போட்ட காவல்துறை நாடகத்தின் உண்மையான “மூளை” யார் என்று அவர் ஆவேசமாகக் கேள்வி எழுப்பினார்.
கரூரில் தன் சொந்த அக்கா, தங்கைகளையும், குழந்தைகளையும் இழந்து தான் தவித்த போது, வாய் இருக்கிறது என்பதற்காக எதை வேண்டுமானாலும் பேசி அரசியல் ஆதாயம் தேட முயன்றவர்களை மக்கள் அடையாளம் காண வேண்டும் என்று கேட்டுக்கொண்டார். இந்தச் சம்பவம் தொடர்பாகச் தற்போது சிபிஐ தீவிர விசாரணை நடத்தி வரும் சூழலிலும், உச்ச நீதிமன்றத்தில் வழக்கு நிலுவையில் இருக்கும் நிலையிலும், ஒரு மாநில முதலமைச்சராகத் தன் கட்டுப்பாட்டின் கீழ் உள்ள காவல்துறை மீதே விஜய் இத்தகைய பகிரங்கப் புகாரைத் திருப்பியிருப்பது அரசியல் வட்டாரத்தில் பெரும் சலசலப்பை ஏற்படுத்தியுள்ளது.
தவெகவுக்கு எதிராகத் திட்டமிட்டு நடத்தப்பட்ட இந்தச் சதி மற்றும் சூழ்ச்சியினைத் தற்போதைய மக்கள் மட்டுமல்லாது வரும் தலைமுறையினரும் அறிந்துகொள்ள வேண்டும் என்பதற்காக, கரூரில் தவெக சார்பாக ஒரு நினைவுச் சின்னம் அமைக்கப்படும் என்றும் அவர் இந்த மேடையில் உறுதியளித்தார். தொடர்ந்து பேசிய அவர், தனக்கு எதிராக அரசியல் செய்பவர்கள், தன்னை மக்களை விட்டு ஓடிவிடச் செய்ய வேண்டும் என்று நினைப்பதாகவும், ஆனால் நமக்காக வந்துள்ள மக்களைக் காக்க வைத்து ஆதாயம் தேடும் அரசியல்வாதி தான் அல்ல என்றும் திட்டவட்டமாகக் கூறினார்.
தொடர்ந்து திமுகவின் நிர்வாக முறைகேடுகள் மற்றும் ஊழல்கள் குறித்துப் பேசிய முதலமைச்சர் விஜய், சட்டமன்றத்தில் தான் எழுப்பிய “பார்ட்டி ஃபண்ட்” விவகாரத்தை மீண்டும் கையில் எடுத்தார். தான் சட்டமன்றத்தில் பேசும்போது எந்தவொரு குறிப்பிட்ட கட்சியின் பெயரையோ அல்லது நபரின் பெயரையோ சொல்லாமல், பொதுவாகவே ‘பார்ட்டி ஃபண்ட்’ என்றுதான் குறிப்பிட்டதாகக் கூறிய அவர், ஆனால் அந்த வார்த்தையைக் கேட்டதுமே சட்டமன்றத்தில் இருந்து திமுகவினர் ஏன் அஞ்சி ஓட்டம் பிடித்தார்கள் என்று கிண்டலாகக் கேட்டார். “குற்றம் உள்ள நெஞ்சுதான் குறுகுறுக்கும்” என்ற பழமொழியைச் சுட்டிக்காட்டிய அவர், இவர்களின் செயல்பாடு “எங்க அப்பா பீரோவுக்குள் இல்லை” என்று தானாக முன்வந்து உளறுவதைப் போல மிகவும் வேடிக்கையாகவும் விசித்திரமாகவும் இருப்பதாகச் சாடினார்.
ஒவ்வொரு அரசுத் துறையிலும் தீய சக்தியாக விளங்கும் திமுகவும், தீர்ந்துபோன சக்தியாக விளங்கும் அதிமுகவும் கூட்டுக் களவாணிகளாக மாறி, மாறி ‘பார்ட்டி ஃபண்ட்’ என்ற பெயரில் ஒட்டுமொத்தத் தமிழகத்தையும் கொள்ளையடித்துள்ளதாகக் குற்றம் சாட்டினார். இதற்கு உதாரணமாக, சென்னையில் ஒரு மேம்பாலம் கட்டுவதற்கு வழக்கமாக ஆகும் செலவை விட இருமடங்கு கூடுதல் தொகையில் ஒப்பந்தம் விடப்பட்டிருந்த மாபெரும் ஊழலைத் தனது அரசு கண்டுபிடித்துத் தற்போது ரத்து செய்துள்ளதாகக் குறிப்பிட்ட விஜய், இன்னும் எத்தனை கோடி, எத்தனை லட்சம் ஊழல்கள் இந்தத் தமிழகத்தில் புதைந்து கிடக்கின்றனவோ, அவை அனைத்தையும் தோண்டத் தோண்ட உண்மைகள் வெளியே வரும் என்றும், அப்போது அதிகார வர்க்கத்தின் ஒவ்வொரு முகமூடியும் கிழியும் என்றும் எச்சரித்தார்.
எதிர்க்கட்சித் தலைவர்கள் மீதான தனது தனிப்பட்ட மற்றும் அரசியல் ரீதியான தாக்குதல்களைத் தொடுத்த விஜய், தான் பேசத் தொடங்கினாலே கொளத்தூர் தொகுதியில் பெரிய அளவில் நடுக்கம் ஏற்பட்டு, கொத்து பரோட்டா போடப்பட்டு வருவதாக எள்ளி நகையாடினார். முதலமைச்சர் என்கிற முறையில் ஸ்டாலின் சார் மீது தனக்குத் தனிப்பட்ட பாசம் இருப்பதாகக் குறிப்பிட்ட அவர், ஆனால் தங்களைக் கண்டு அஞ்சி சிலர் சிங்கப்பூரில் போய் ஒளிந்திருப்பதாகவும், தான் கரூருக்குள் நுழைந்த உடனே மற்றொருவர் ஓடிவிட்டதாகவும், இப்படித் தவெகவின் எழுச்சியைக் கண்டு திமுகவினர் ஒட்டுமொத்தமாக அஞ்சி நடுங்குவதாகவும் பேசினார். காதில் ரத்தம் வராத குறையாகத் தங்களைப் பற்றி அவதூறு பரப்புபவர்கள் ஊழலிலேயே ஊறிப்போனவர்கள் என்றும், வாயைத் திறந்து பேசத் துப்பில்லாதவர்கள் தன்னை நோக்கி வசைபாடுவதாகவும் அவர் கடுமையாகச் சாடினார்.
இறுதியாகத் தமக்கு எப்போதும் பணத்தை விடத் தன்னை நம்பி வந்த ‘ஜனம்’ எனப்படும் மக்கள் கூட்டமே முக்கியம் என்று முழங்கிய விஜய், தங்களுக்கு இவ்வளவு வலிகளையும் காயங்களையும் கொடுத்தவர்களுக்கு 2026 சட்டமன்றத் தேர்தலில் தமிழக மக்கள் தகுந்த பதிலடி கொடுத்துவிட்ட போதிலும், அது மட்டுமே போதாது என்று ஆக்ரோஷமாகப் பேசினார். தீய சக்தியான திமுக காலாகாலத்திற்கும் மீண்டும் தமிழக அரசியலில் எழுந்திருக்கவே முடியாத அளவுக்கு, அவர்களுக்கு மக்கள் நிரந்தரமான பதிலடியைத் தொடர்ந்து கொடுத்துக்கொண்டே இருக்க வேண்டும் என்று கேட்டுக்கொண்டார்.
தமிழகத்தில் வரவிருக்கும் இடைத்தேர்தலில் இந்தத் தீய சக்திகளை மக்கள் நல்லபடி கவனித்து, வெளுத்து வாங்க வேண்டும் என்று கூறி, இடைத்தேர்தலுக்கான அரசியல் களத்தைத் தனது அனல் பறக்கும் பேச்சின் மூலம் தொடங்கி வைத்தார். இன்னும் சில நாட்களில் விஜய் அரசின் உண்மையான விஸ்வரூபத்தை அனைவரும் பார்ப்பார்கள் என்றும், சதிகாரர்களின் முகத்திரையைத் தன் அரசு நிச்சயம் கிழிக்கும் என்றும் உறுதிபடக் கூறித் தனது உரையை அவர் நிறைவு செய்தார்.
இந்நிலையில் ,”கரூரின் அந்த மேடையில் விஜய் பேசிய ஒவ்வொரு வார்த்தையும், வெறும் அரசியல் உரையாக மட்டும் பார்க்கப்படவில்லை; அது தவெக-வின் எதிர்கால அரசியல் பயணத்திற்கான ஒரு போர் முரசாகவே கருதப்படுகிறது. தனது மக்கள் பட்ட துயரங்களுக்குத் துளிக்கூட நீதி கிடைக்காமல் போகவிடமாட்டேன் என்று சூளுரைத்த அவர், அந்தப் பலியான ஆன்மாக்களுக்குத் தான் செய்யும் மிகப்பெரிய மரியாதையாகவே இந்த இடைத்தேர்தல் வெற்றியைப் பார்க்கிறார்.
மேலும் , ‘வாயைத் திறந்தாலே ஓடி ஒளிபவர்கள், 5 நிமிடம் கூட நேருக்கு நேர் விவாதிக்கத் திராணியற்றவர்கள்’ என்று திமுக அமைச்சர்களைக் காட்டமாகச் சாடிய விஜய், மக்கள் காசுக்குக் கொள்ளையடிக்கும் அந்த அமைச்சர்களின் முகமூடிகளைத் தன் அரசு ஒவ்வொன்றாகக் கிழிக்கும் என்று முழங்கினார். ஊழலிலேயே ஊறிப்போன அந்தத் தீய சக்திகளின் வீழ்ச்சி, கரூரில் இருந்து தொடங்குகிறது என்பதைத் தெளிவுபடுத்திய அவர், வரப்போகும் இடைத்தேர்தலில் அவர்களைச் சுருட்டித் தூக்கி எறியுமாறு மக்களைக் கேட்டுக்கொண்டார். அமைச்சர்களின் அராஜகங்களுக்கும், கொள்ளைகளுக்கும் முடிவு கட்டும் காலம் கனிந்துவிட்டது என்பதை விஜய்யின் இந்தப் பேச்சு தமிழக அரசியல் களத்தில் மிக அழுத்தமாகப் பதிவு செய்துள்ளது.”
இவர் பேசியது குறித்து நீங்கள் நினைக்கும் கருத்துக்களை மறக்காமல் கமெண்டில் பதிவிடுங்கள்..!