திருவாரூர்: பெண் காவலருக்கு பாலியல் தொல்லை கொடுத்த புகாரில் சஸ்பெண்ட் செய்யப்பட்ட திருவாரூர் ஆயுதப்படை போலீஸ்காரர் கைது செய்யப்பட்டார்.
திருவாரூர் மாவட்ட ஆயுதப்படை பிரிவில் பணியாற்றி வரும் 22 வயதான பெண் காவலர் ஒருவர், பணி நிமித்தமாக கடந்த 18ம் தேதி, தஞ்சாவூர் சென்றுவிட்டு மீண்டும் திருவாரூருக்கு பேருந்தில் சென்றார். அப்போது அதே ஆயுதப்படை பிரிவில் எழுத்தராக பணிபுரிந்து வரும் காவலர் சற்குணம் (32) என்பவர் வழியில் கொரடாச்சேரி என்ற இடத்தில் இறங்கி தனது பைக்கில் திருவாரூர் நோக்கி அழைத்து சென்றார். அப்போது அந்த பெண் காவலரிடம் சற்குணம் பாலியல் ரீதியாக தவறாக நடக்க முயன்றதாக கூறப்படுகிறது.
இது தொடர்பாக பாதிக்கப்பட்ட பெண் காவலர் கொடுத்த புகாரின் பேரில் விசாரணை மேற்கொண்ட எஸ்பி சுரேஷ்குமார், ஆயுதப்படை போலீஸ்காரர் சற்குணத்தை கடந்த 20ம் தேதி அதிரடியாக சஸ்பெண்ட் செய்து உத்தரவிட்டார். இந்நிலையில் பெண் காவலர் புகார் தொடர்பாக, திருவாரூர் தாலுகா போலீசார் வழக்குப்பதிவு செய்து ஆயுதப்படை போலீஸ்காரர் சற்குணத்தை நேற்று கைது செய்தனர்.