இந்தியா, பாகிஸ்தான் இடையிலான போர் தீவிரம் அடையாமல் தடுத்ததற்காக அமெரிக்க அதிபர் டொனால்ட் டிரம்புக்கு நோபல் பரிசு வழங்க பாகிஸ்தான் அதிகாரபூர்வமாக அறிவிக்கை வெளியிட்டு உள்ளது. பிராந்தியத்தில் முழு அளவிலான போரை நிறுத்தி அமைதிக்கு வழிவகுத்ததற்காக டிரம்ப் அமைதிக்கான நோபல் பரிசு பெற தகுதி படைத்தவர் என பாகிஸ்தான் தெரிவித்திருக்கிறது. பஹல்காம் பயங்கரவாத தாக்குதல் சம்பவத்தை அடுத்து இந்தியா, பாகிஸ்தான் இடையே போர் பதற்றம் நிலவியது.
இதில், அமெரிக்க அதிபர் டிரம்ப் தலையிட்டு மத்தியஸ்தம் செய்ததால் தான் போர் முடிவுக்கு வந்ததாக டிரம்ப் சொன்னார்.இருப்பினும், டிரம்பின் இந்த அறிவிப்பை இந்தியா வெளிப்படையாக மறுத்தது. இந்தியா, பாகிஸ்தான் விவகாரத்தில் 3-ஆம் தரப்புக்கு இந்தியா இடம் கொடுக்கவில்லை என பிரதமர் மோடி தெளிவாக கூறினார்.
இருந்த போதிலும், டொனால்ட் டிரம்ப் தொடர்ச்சியாக இதே கருத்தை முன்வைத்ததால், அவரை தொடர்பு கொண்டு தொலைபேசியில் பேசிய பிரதமர் மோடி, இதற்கு ஆட்சேபம் தெரிவித்தார். இதனிடையே, பாகிஸ்தானை குளிர்விக்கும் வகையில், டொனால்ட் டிரம்ப் சில விரும்பத்தகாத நிகழ்வுகளை அரங்கேற்றினார் . இந்த நிலையில் தான், டிரம்புக்கு அமைதிக்கான நோபல் பரிசு வழங்க வேண்டுமென பாகிஸ்தான் அதிகாரபூர்வமாக பரிந்துரை செய்திருக்கிறது. இதுதொடர்பாக பாகிஸ்தான் வெளியிட்ட அறிவிக்கை விவரத்தில், டொனால்ட் டிரம்பின் குறுக்கீடு காரணமாக தான் இந்தியா, பாகிஸ்தான் பிராந்தியத்தில் போர் பதற்றம் அதிகரிக்காமல் அமைதி திரும்பியது.
டிரம்ப் மத்தியஸ்தம் செய்ததால்தான் போர் பதற்றம் தணிந்தது. காஷ்மீர் பிரச்னை மட்டுமல்லாமல், தெற்கு ஆசியாவில் அமைதி நிலவுவதற்கும் டிரம்ப் கடுமையான நடவடிக்கைகளை மேற்கொண்டு வருகிறார். டிரம்பின் நடவடிக்கை பாராட்டுக்குரியது. இதற்காக அவருக்கு அமைதிக்கான நோபல் பரிசு வழங்க வேண்டும் என பாகிஸ்தான் கோரிக்கை விடுத்துள்ளது.
இதனிடையே, உலக நாடுகளின் போரை நிறுத்தியதற்காக தனக்கு நோபல் பரிசு வழங்க வேண்டாம் என டிரம்ப் தெரிவித்துள்ளார். இதுதொடர்பாக ட்ரூத் சமூக வலைதளத்தில் அவர் கூறியதில், இந்தியா, பாகிஸ்தான் போரை நிறுத்தியமைக்காக நான் நோபல் பரிசு பெற போவதில்லை. இதேபோல செரீபியா- கொசாவா, எகிப்து- எத்தியோப்பியா, மத்திய கிழக்கில் ஆபிரகாம் ஒப்பந்தம் ஆகியவற்றை ஏற்படுத்தி, அமைதியைக் கொண்டு வந்ததற்காக எனக்கு அமைதிக்கான நோபல் பரிசு வழங்க வேண்டாம்.
