ஜப்பானின் அய்ச்சி மாகாணத்தில் உள்ள நகோயா நகரில் 20-வது ஆசிய விளையாட்டு போட்டிகள் நடைபெற்று வருகின்றன. இதில் இந்தியா, ஜப்பான், சீனா, தென்கொரியா உள்ளிட்ட 45 நாடுகளைச் சேர்ந்த சுமார் 11 ஆயிரம் வீரர், வீராங்கனைகள் பங்கேற்று தங்களது திறமைகளை வெளிப்படுத்தி வருகின்றனர்.
இந்த நிலையில், பளுதூக்குதல் போட்டியில் இந்தியாவின் நட்சத்திர வீராங்கனை மீராபாய் சானு வரலாற்றுச் சாதனை படைத்துள்ளார். பெண்களுக்கான 49 கிலோ எடைப்பிரிவில் நடைபெற்ற போட்டியில், மொத்தமாக 198 கிலோ எடையைத் தூக்கி மீராபாய் சானு வெள்ளிப் பதக்கத்தை கைப்பற்றியுள்ளார்.
ஆசிய விளையாட்டு போட்டியில் இதுவரை பதக்கம் வெல்லாத மீராபாய் சானுவுக்கு, இந்த வெள்ளிப் பதக்கம் மிகவும் முக்கியத்துவம் வாய்ந்ததாக அமைந்துள்ளது. இதன் மூலம் ஆசிய விளையாட்டு போட்டியில் தனது முதல் பதக்கத்தை வென்றுள்ள அவர், தற்போது தனது பதக்கக் கணக்கை வெள்ளியுடன் தொடங்கியுள்ளார்.
மீராபாய் சானுவின் இந்த சாதனைக்கு பிரதமர் மோடி வாழ்த்து தெரிவித்துள்ளார். அவர் வெளியிட்டுள்ள வாழ்த்து செய்தியில், “ஒரு சிறப்பான வெள்ளிப் பதக்கம் மீராபாய் சானுவுக்கு..! மகளிருக்கான 49 கிலோ எடைப்பிரிவு பளுதூக்கும் போட்டியில் பதக்கம் வென்ற அவருக்கு எனது வாழ்த்துகள்” என்று தெரிவித்துள்ளார்.
மேலும், மீராபாய் சானுவின் உறுதியும் விடாமுயற்சியும் தேசத்துக்கு உத்வேகம் அளிப்பதாக குறிப்பிட்டுள்ள பிரதமர் மோடி, அவரது சாதனையால் இந்தியா பெருமை கொள்வதாகவும் தெரிவித்துள்ளார். தொடர்ந்து, மீராபாய் சானுவின் எதிர்கால முயற்சிகளுக்கும் பிரதமர் மோடி தனது வாழ்த்துகளை தெரிவித்துள்ளார். ஆசிய விளையாட்டில் தனது முதல் பதக்கத்தை வென்று இந்தியாவுக்கு பெருமை சேர்த்துள்ள மீராபாய் சானுவுக்கு, பிரதமரின் வாழ்த்து தற்போது கவனம் பெற்றுள்ளது.
