மத்திய கிழக்கு பிராந்தியத்தில் அமெரிக்காவுக்கும் ஈரானுக்கும் இடையிலான மோதல் இதுவரை இல்லாத அளவுக்கு உச்சக்கட்ட பதற்றத்தை எட்டியுள்ளது. ஈரானுக்கு எதிராக தொடர்ந்து 12 நாட்களாக அமெரிக்கா தீவிர வான்வழித் தாக்குதல்களை நடத்தி வரும் நிலையில், இந்தப் போர் தற்போது அண்டை நாடுகளுக்கும், வர்த்தகப் பாதைகளுக்கும் விரிவடைந்து உலக நாடுகளை அச்சுறுத்தத் தொடங்கியுள்ளது.
ஈரானுக்கு எதிரான அமெரிக்காவின் தொடர் முற்றுகைக்குப் பதிலடியாக, ஏமனின் ஈரான் ஆதரவு ஹவுதி கிளர்ச்சியாளர்கள் செங்கடலில் தங்கள் கடற்படை நடவடிக்கைகளைத் தீவிரப்படுத்தியுள்ளனர். இதன் ஒரு பகுதியாக, சவுதி அரேபியக் கொடியுடன் இயங்கிய ‘என்செலியா’ (Enselia) என்ற எண்ணெய் கப்பல் மீது ஹவுதிகள் சக்திவாய்ந்த தாக்குதலை நடத்தியுள்ளனர்.
நாசா வெளியிட்டுள்ள செயற்கைக்கோள் தரவுகளின்படி, அந்தக் கப்பல் செங்கடலில் தீப்பிடித்து எரிவது உறுதியாகியுள்ளது. அதிர்ஷ்டவசமாக, தாக்குதலுக்குள்ளான கப்பல்களின் பணியாளர்கள் அனைவரும் காயமின்றி தப்பியுள்ளதாகத் தகவல்கள் தெரிவிக்கின்றன. இதற்கிடையில், சவுதி அரேபியாவுக்கு எதிரான கடற்படை நடவடிக்கைகளைத் தொடர்வதிலும், “முற்றுகைக்கு முற்றுகை” என்ற கொள்கையில் உறுதியாக இருப்பதிலும் பின்வாங்க மாட்டோம் என்று ஹவுதி இராணுவ செய்தித் தொடர்பாளர் யஹ்யா சாரீ பகிரங்கமாக எச்சரித்துள்ளார்.
மறுபுறம், வணிகக் கப்பல்களின் பாதுகாப்பை உறுதி செய்யும் சர்வதேசச் சட்டங்களை இந்தத் தாக்குதல்கள் முற்றிலுமாக மீறுவதாக சவுதி அரேபியாவின் அரசாங்க செய்தி நிறுவனம் கடும் கண்டனம் தெரிவித்துள்ளது. அமெரிக்கா – சவுதி அணுசக்தி ஒப்பந்தமும் உலகளாவிய கவலைகளும் ஒருபுறம் போர் சூழல் தீவிரமடைந்து வரும் வேளையில், மறுபுறம் அமெரிக்கத் தொழில்நுட்பம் மற்றும் நிபுணத்துவத்தைப் பயன்படுத்தி சவுதி அரேபியாவில் சிவில் அணுசக்தித் திட்டத்தை நிறுவுவதற்கான 30 ஆண்டு கால முக்கிய ஒப்பந்தத்தில் இரு நாடுகளும் கையெழுத்திட்டுள்ளன.
இஸ்ரேலைத் தவிர்த்த பிற மத்திய கிழக்கு நாடுகள் அணு ஆயுதங்களை அடைவதைத் தடுப்பதே தங்கள் நோக்கம் என்று அமெரிக்க வெளிவிவகார அமைச்சர் மார்கோ ரூபியோ விளக்கமளித்தாலும், முந்தைய ஐக்கிய அரபு அமீரக ஒப்பந்தத்தில் இடம்பெற்றிருந்த கடுமையான “தங்கத் தரநிலை” (Gold Standard) பாதுகாப்பு நெறிமுறைகள் இந்த சவுதி ஒப்பந்தத்தில் இல்லை என்று நிபுணர்கள் தீவிர கவலை தெரிவித்துள்ளனர்.
மத்திய கிழக்கின் போர் ஒருபுறம் அண்டை நாடுகளுக்கு பரவ, உலகளாவிய எண்ணெய் வர்த்தகத்தின் மிக முக்கியமான தமனியான ஹார்முஸ் ஜலசந்தியில் பதற்றம் வெடித்துள்ளாட்டுள்ளது. கடந்த மூன்று மாதங்களில் இந்தப் பகுதியில் 30-க்கும் மேற்பட்ட எண்ணெய் கப்பல்கள் மீது ஈரான் தாக்குதல் நடத்தியிருப்பதாக அமெரிக்கா குற்றம் சாட்டியுள்ளது.
இந்நிலையில், ஹார்முஸ் ஜலசந்தியில் கப்பல்கள் மீது ராக்கெட், ஏவுகணை அல்லது டிரோன் தாக்குதல்கள் நடத்தப்பட்டால், ஈரானின் பாலங்கள் மற்றும் அனல் மின் நிலையங்கள் மீதும், தெஹ்ரானில் உள்ள முக்கிய கட்டமைப்புகள் மீதும் அமெரிக்கா கடுமையான பதிலடித் தாக்குதலைத் தொடுக்கும் என அமெரிக்க அதிபர் டொனால்ட் டிரம்ப் ‘ட்ரூத்’ சமூக வலைதளம் மூலமாக கடுமையான எச்சரிக்கை விடுத்துள்ளார்.
டிரம்பின் இந்த எச்சரிப்புக்கு ஈரான் கடும் கொந்தளிப்புடன் பதிலடி கொடுத்துள்ளது. ஈரானிய பாராளுமன்ற சபாநாயகர் தனது எக்ஸ் தளத்தில் வெளியிட்ட பதிவில், “எங்களால் இந்த பிராந்தியத்தில் எண்ணெய் விற்க முடியாத நிலை ஏற்பட்டால், வேறு யாராலும் எண்ணெய் ஏற்றுமதி செய்ய முடியாது. எங்கள் பாதுகாப்பு உறுதி செய்யப்படாவிட்டால், பிராந்தியத்தில் எந்த உள்கட்டமைப்பும் பாதுகாப்பாக இருக்காது” என திட்டவட்டமாகத் தெரிவித்தார். மேலும், அமெரிக்காவின் நட்பு நாடுகளுக்குத் தேவையான மின் விநியோகத்தைத் துண்டிப்போம் என்றும் ஈரான் எச்சரித்துள்ளது.
உலக எண்ணெய் வர்த்தகத்தில் சுமார் 20 சதவீதம் ஹார்முஸ் ஜலசந்தி வழியேதான் நடக்கிறது. எனவே, அங்கு ஏற்பட்டுள்ள இந்த நேரடி மோதல் போக்கு சர்வதேசச் சந்தையில் பெரும் பொருளாதாரத் தாக்கத்தையும், விலையேற்றத்தையும் ஏற்படுத்தும் அபாயத்தை உருவாக்கியுள்ளது. இதனால் உலக நாடுகள் அனைத்தும் இப்பகுதியில் நிலவும் சூழலை மிகுந்த எச்சரிக்கையுடன் கவனித்து வருகின்றன.
அமெரிக்கா மற்றும் ஈரானின் இந்தத் தொடர் மோதல்களால் மத்திய கிழக்கு நாடுகள் மட்டுமின்றி, ஒட்டுமொத்த உலகப் பொருளாதாரமே பெரும் அச்சுறுத்தலைச் சந்தித்துள்ளது. உலக எண்ணெய் வர்த்தகத்தின் முக்கியப் பாதையான ஹார்முஸ் ஜலசந்தியை முடக்குவோம் என்ற ஈரானின் எச்சரிக்கையும், தக்க பதிலடி கொடுப்போம் என்ற டிரம்பின் மிரட்டலும் பதற்றத்தை உச்சத்திற்கு கொண்டு சென்றுள்ளன.
இப்பிரச்சினைக்கு விரைவில் ஒரு அமைதித் தீர்வு எட்டப்படாவிட்டால், சர்வதேச அளவில் கடுமையான எரிபொருள் விலையேற்றமும், மிகப்பெரிய பொருளாதார வீழ்ச்சியும் ஏற்படுவதைத் தவிர்க்க முடியாது. அடுத்தகட்டமாக என்ன நடக்கப்போகிறது என்ற பதற்றமான எதிர்பார்ப்புடன் உலக நாடுகள் இந்தச் சூழலை உன்னிப்பாகக் கவனித்து வருகின்றன என்பதும் குறிப்பிடத்தக்கது
