நடிகர் விஜய்யின் தமிழக வெற்றி கழகம் தமிழக அரசியலில் ஒரு புதிய வரவாக களமிறங்கியுள்ள நிலையில், 2026 சட்டமன்ற தேர்தல் முடிவுகள் குறித்த அதிர்ச்சியூட்டும் தகவல் ஒன்று டெல்லியிலிருந்து பெறப்பட்டதாக ஒரு ரகசிய சர்வே மூலம் வெளியாகியுள்ளது.இந்த சர்வேயின் முதல் கட்ட முடிவுகளின்படி,எதிர்வரும் தேர்தலில் த.வெ.க. சுமார் 70 முதல் 80 தொகுதிகளில் உறுதியாக வெற்றிபெறும் வாய்ப்பு இருப்பதாகத்தெரிய வந்துள்ளது.
2026 சட்டமன்ற தேர்தலில் திமுக, அதிமுக மற்றும் த.வெ.க. என மூன்று முக்கிய போட்டியாளர்களும் கணிசமான எண்ணிக்கையிலான தொகுதிகளை பெற்றாலும், எந்த ஒரு கட்சியோ அல்லது கூட்டணியோ ஆட்சியமைக்க தேவையான 118 இடங்களுடன் உறுதியான பெரும்பான்மையை பெறாது. இதன் விளைவாக, தமிழக சட்டமன்ற வரலாற்றில் ஒரு அசாதாரண சூழல் உருவாகி, தொங்கு சட்டசபையே அமையும் என சர்வே முடிவுகள் குறிப்பிடுகிறது.
தொங்கு சட்டசபை அமையும்போது, ஆட்சியமைக்க எஞ்சியிருக்கும் கட்சிகளின் ஆதரவு தேவைப்படும்.ஆனால், இந்த ரகசிய சர்வே மூலம் வெளிவரும் தகவல் முற்றிலும் மாறுபட்டதாக உள்ளது “விஜய், அதிமுகவுக்கும் ஆதரவு தரமாட்டார். திமுகவுக்கும் ஆதரவு தர மாட்டார்.” தனது மாற்று அரசியல் பாதையை நிலைநிறுத்தும் விதமாக, விஜய் எந்த ஒரு திராவிட கூட்டணிக்கோ ஆதரவு அளிக்கும் முடிவை எடுக்க மாட்டார். இதன் மூலம் அவர் ‘ஃபார்மாலிட்டி அரசியல்’ செய்ய மாட்டார் என்ற செய்தி உறுதியாகிறது.
விஜய்யின் இந்த உறுதியான நிலைப்பாட்டால், எந்த கட்சியும் ஆட்சியமைக்க முடியாத ஒரு சட்டச்சிக்கல் ஏற்படும். இந்த அசாதாரண சூழலில், மாநிலத்தில் ஸ்திரமான ஆட்சி,அதாவது ஒரு அரசாங்கத்தின் நிலைத்தன்மை அமையாத நிலையில்,வேறு வழியிலாம தமிழகம் மீண்டும் ஒரு தேர்தலை சந்திக்க நேரிடும். இந்த ரகசிய சர்வேயின்படி, 2026-ஆம் ஆண்டு ஏப்ரல் அல்லது மே மாதம் நடைபெறும் தேர்தலுக்கு பிறகு, அதே ஆண்டு ஜூன் அல்லது ஜூலை மாதங்களில் தமிழகத்தில் மறுதேர்தல் நடைபெறும் என்று கணிக்கப்பட்டுள்ளது.
இந்த மறுதேர்தல் தான் விஜய்க்கும், தமிழக வெற்றி கழகத்திற்கும் திருப்புமுனையாக அமையுமென டெல்லி சர்வே திடுக்கிடும் தகவலை வெளியிட்டுள்ளது. முதல் தேர்தலில் கிடைத்த 70-80 தொகுதிகள் மூலம் த.வெ.க.வின் வலிமையை புரிந்து கொண்ட மக்கள், மறுதேர்தலின் போது, ஸ்திரமான ஆட்சி அமைய வேண்டும், அதே சமயம் திராவிட கட்சிகளுக்கு மாற்றான ஆட்சி வேண்டும் என்ற ஒற்றை இலக்குடன் ஒரு மாற்று சக்திக்கு முழு ஆதரவு அளிப்பார்கள்.
இதன் விளைவாக, மறுதேர்தலில் விஜய் தலைமையிலான தமிழக வெற்றி கழகம் தனிப்பெரும்பான்மையுடன் வெற்றிபெற்று ஆட்சி அமைக்கும் என அந்த ரகசிய சர்வே சுட்டிக்காட்டுவதாக சொல்லப்படுது. இது ஒரு ‘ரகசிய சர்வே’யின் தகவல் என்றாலும், சமூக வலைத்தளங்களில் மட்டும் இந்த தகவல்கள் பரவி வருவதால் இந்த தகவல் எந்த அளவுக்கு உண்மையாக இருக்கும் என்பதை வரவிருக்கும் தேர்தல் காலத்தில பொறுத்திருந்து பார்ப்போம்.
