மத்திய கிழக்கில் அமெரிக்கா மற்றும் ஈரான் இடையேயான மோதல் தற்போது உச்சக்கட்டத்தை எட்டியுள்ளது. ஹார்முஸ் நீரிணையில் வர்த்தகக் கப்பல்கள் மற்றும் அமெரிக்கப் படையினர் மீது இஸ்லாமிய புரட்சிகர பாதுகாப்புப் படையினர் தொடர்ந்து நடத்திவரும் தாக்குதல்களுக்குப் பதிலடி கொடுக்கும் விதமாக, அமெரிக்கப் படைகள் ஈரானின் பல்வேறு முக்கியப் பகுதிகள் மீது அதிரடி வான்வழித் தாக்குதல்களைத் தீவிரப்படுத்தியுள்ளன. இதன் ஒரு பகுதியாக, ஈரானின் சிரிக் நகரில் நடைபெற்ற ஒரு திருமண விழாவின் மீது அமெரிக்கப் படைகள் ஏவுகணைகளை வீசி நள்ளிரவு முழுவதும் தீவிரத் தாக்குதல் நடத்தியுள்ளன.
இந்தத் திடீர் தாக்குதலில் ஒரு குழந்தை உட்பட நான்கு பொதுமக்கள் பரிதாபமாக உயிரிழந்துள்ளனர்; மேலும் ஐம்பதுக்கும் மேற்பட்டோர் படுகாயங்களுடன் மருத்துவமனையில் சிகிச்சை பெற்று வருகின்றனர். ஹார்முஸ் நீரிணையில் அமெரிக்கப் படை வீரர்கள் மீதான அச்சுறுத்தல்களுக்கு முற்றுப்புள்ளி வைப்பதற்கே இந்தத் தாக்குதல்கள் நடத்தப்படுவதாக அமெரிக்க ராணுவம் தரப்பில் விளக்கமளிக்கப்பட்டுள்ளது. இருப்பினும், பொதுமக்கள் மீது நடத்தப்பட்ட இந்தத் தாக்குதல் அப்பகுதியில் போருக்கான பதற்றத்தை மேலும் பல மடங்கு அதிகரித்துள்ளது..இது குறித்த பின்னணி தகவல்களை தற்பொழுது விரிவாக பார்க்கலாம்.!
கடந்த சில நாட்களுக்கு முன்பு, ஹார்முஸ் நீரிணையில் கப்பல் போக்குவரத்து பாதைகளில் ஈரான் தரப்பிலிருந்து கண்ணிவெடிகள் புதைக்கப்படுவதைத் தடுக்கும் நோக்கத்தோடு, லராக் தீவில் உள்ள ஈரானிய ராக்கெட் ஏவுதளங்கள் மீது அமெரிக்கா தனது வான்வழித் தாக்குதலைத் தொடங்கியது. இதன் தொடர்ச்சியாக, ஈரானின் தெற்கே அமைந்துள்ள ஹார்முஸ் ஜலசந்தி பகுதி, வளைகுடாவில் உள்ள தீவுகள் மற்றும் தெற்கு கெர்மான் மாகாணத்தில் உள்ள விமான நிலையம் ஆகியவற்றின் மீதும் அமெரிக்கப் போர் விமானங்கள் குண்டுகளை வீதின.
மேலும், சபஹர் மற்றும் கொனார்க் மாவட்டப் பகுதிகளிலும் அடுத்தடுத்து நான்கு ஏவுகணைகள் பாய்ந்தன.குறிப்பாக, ஈரானின் சிரிக் நகரில் அமைதியான முறையில் நடைபெற்ற ஒரு திருமண விழாவின் மீது அமெரிக்கா ஏவுகணைத் தாக்குதல் நடத்தியதாக ஈரானின் அதிகாரப்பூர்வ செய்தி நிறுவனமான ‘IRNA’ ஆவேசமாகத் தெரிவித்துள்ளது.
நள்ளிரவு நேரத்தில் நடத்தப்பட்ட இந்தத் திடீர் தாக்குதலில், ஒரு பச்சிளம் குழந்தை உட்பட நான்கு பொதுமக்கள் சம்பவ இடத்திலேயே பரிதாபமாக உயிரிழந்தனர். மேலும், ஐம்பதுக்கும் மேற்பட்டோர் படுகாயங்களுடன் மீட்கப்பட்டு அருகிலுள்ள மருத்துவமனைகளில் தீவிர சிகிச்சைப் பெற்று வருகின்றனர்.
பொதுமக்கள் மீது நடத்தப்பட்ட இந்தத் தாக்குதலுக்கு எதிராக ஈரான் தரப்பில் கடுமையான கோபமும் எதிர்ப்பும் வெளிப்பட்டுள்ளது. ஈரானின் உச்ச தலைவர் மொஜ்தபா கமேனி, அமெரிக்கா மற்றும் இஸ்ரேலுக்கு எதிராக அனைத்து இஸ்லாமிய நாடுகளும் ஒன்றுபட்டு நிற்க வேண்டும் என்று ஏற்கனவே பகிரங்க வேண்டுகோள் விடுத்திருந்தார்.
இந்தச் சூழலில் திருமண விழா மீதான தாக்குதல் நடந்திருப்பது இரு நாடுகளுக்கும் இடையேயான மோதலை உச்சகட்டத்திற்குக் கொண்டு சென்றுள்ளது. இந்தத் தாக்குதலுக்கு உடனடியாகப் பதிலடி கொடுக்கும் விதமாக, ஜோர்டானில் அமைந்துள்ள கிங் ஹுசைன் மற்றும் அல்-அஸ்ரக் ஆகிய இரண்டு முக்கிய அமெரிக்க விமானப்படை தளங்கள் மீது ஈரான் தரப்பிலிருந்து பாலிஸ்டிக் ஏவுகண்கள் ஏவப்பட்டன.
ஈரானில் இருந்து பாய்ந்து வந்த 10 பாலிஸ்டிக் ஏவுகணைகளில் பெரும்பாலானவற்றை ஜோர்டான் ராணுவம் தனது வான் பாதுகாப்பு அமைப்பு மூலம் இடைமறித்து அழித்தது.இருப்பினும், மூன்று ஏவுகணைகள் தொலைதூரப் பகுதிகளில் வந்து விழுந்தன. இதுமட்டுமின்றி, குவைத் மற்றும் பஹ்ரைன் நாடுகளின் வான்பரப்புகளிலும் அடுத்தடுத்து ஏவுகணை மற்றும் ட்ரோன் தாக்குதல்கள் பதிவாகின.
இதன் காரணமாக, பஹ்ரைன் நாட்டின் உள்துறை அமைச்சகம் உடனடியாக எச்சரிக்கை விடுத்து, பொதுமக்கள் தங்களது பாதுகாப்பான இடங்களை நோக்கிச் செல்லுமாறு அறிவுறுத்தியுள்ளது. பொதுமக்கள் குறிவைக்கப்பட்டதாக ஈரான் தரப்பு எழுப்பும் குற்றச்சாட்டுகளை அமெரிக்க ராணுவம் திட்டவட்டமாக மறுத்துள்ளது.
அமெரிக்க மத்திய கட்டளைப் பிரிவின் செய்தித் தொடர்பாளரான கேப்டன் டிம் ஹாக்கின்ஸ் கூறுகையில், அமெரிக்க ராணுவம் ஒருபோதும் பொதுமக்களை இலக்காகக் கொண்டு தாக்குதல் நடத்துவதில்லை என்று விளக்கமளித்துள்ளார். ஹார்முஸ் நீரிணையில் அமெரிக்கப் படை வீரர்கள் மீதும் வர்த்தகக் கப்பல்கள் மீதும் நடத்தப்பட்ட தொடர் அச்சுறுத்தல்களுக்கு முற்றுப்புள்ளி வைக்கவே இந்தத் தாக்குதல்கள் நடத்தப்படுவதாக சென்ட்காம் தரப்பில் எக்ஸ் தளம் வாயிலாகத் தெரிவிக்கப்பட்டுள்ளது.
இதற்கிடையில், ஈரானின் ஐ.ஆர்.ஜி.சி. செய்தித் தொடர்பாளர் ஹொசைன் மொஹேபி வெளியிட்டுள்ள கடுமையான எச்சரிக்கையில், வாஷிங்டன் தனது இந்த புதிய மற்றும் தொடர் தாக்குதல்களுக்கு மிக விரைவில் கடுமையான விலையைக் கொடுத்து வருந்தும் என்றும், ஆக்கிரமிப்பாளர்களுக்கான தண்டனை கடுமையாக இருக்கும் என்றும் எச்சரித்துள்ளார்.
ஈரானிய தரப்பில் இருந்து அச்சுறுத்தல்கள் தொடர்ந்தாலும், கடந்த ஆறு மாதங்களுக்கும் மேலாகத் தொடர்ந்துவரும் இந்தத் போர்ச் சூழலால் ஹார்முஸ் நீரிணைப் பாதை தொடர்ச்சியாக மூடப்பட்டே கிடக்கிறது. மேலும், ஈரானிய துறைமுகங்கள் மீதான தனது கடற்படை முற்றுகையை அமெரிக்கா சற்றும் தளர்த்தாமல் தொடர்ந்து தீவிரமாக நடைமுறைப்படுத்தி வருவது மத்திய கிழக்கு வட்டாரத்தில் போருக்கான பதற்றத்தை மேலும் பல மடங்கு அதிகரித்துள்ளது.
