தமிழ்த் திரையுலகின் ஜாம்பவான் இயக்குநர் பாரதிராஜா அவர்களின் மறைவையொட்டி, அவருக்கு அரசு மரியாதை செலுத்தப்படும் என்று தமிழக முதலமைச்சர் விஜய் அறிவித்துள்ளார்.
உடல்நலக்குறைவு காரணமாக இன்று சென்னையில் உள்ள தனது இல்லத்தில் காலமான இயக்குநர் பாரதிராஜாவின் மறைவு, ஒட்டுமொத்த தமிழகத்தையும் சோகத்தில் ஆழ்த்தியுள்ளது. திரைத்துறையினர் மற்றும் ரசிகர்கள் தங்களின் ஆழ்ந்த இரங்கல்களைத் தெரிவித்து வரும் நிலையில், அரசு தரப்பிலிருந்து முக்கிய அறிவிப்பு வெளியாகியுள்ளது.
இயக்குநர் பாரதிராஜாவின் மறைவுச் செய்தியறிந்த முதலமைச்சர் விஜய், உடனடியாக அவரது இல்லத்திற்கு நேரில் சென்று, பாரதிராஜாவின் உடலுக்கு மலர் வளையம் வைத்து இறுதி மரியாதை செலுத்தினார். அப்போது அவரது குடும்பத்தினருக்கு முதலமைச்சர் தனது ஆழ்ந்த ஆறுதலைத் தெரிவித்தார்.
இதனைத் தொடர்ந்து தனது சமூக வலைதளப் பக்கத்தில் முதலமைச்சர் விஜய் வெளியிட்டுள்ள இரங்கல் செய்தியில்:
“தமிழ்த் திரையுலகின் இயக்குநர் இமயம் பாரதிராஜா காலமானார் என்ற செய்தி அறிந்து மிகுந்த மனவேதனையும் துயரமும் அடைந்தேன். கிராமியப் பின்னணியில் வாழ்வியல் உயிரோட்டத்துடன் பல வெற்றிப் படங்களை உருவாக்கி, தமிழ்த் திரைப்பட உலகில் தனக்கென தனி முத்திரை பதித்தவர். பல தலைமுறைக் கலைஞர்களை உருவாக்கிய அவரது பங்களிப்பு தமிழ்த் திரைப்பட வரலாற்றில் என்றென்றும் நிலைத்திருக்கும். அவரது மறைவு ஈடுசெய்ய முடியாத பேரிழப்பு,” என்று குறிப்பிட்டுள்ளார்.
பாரதிராஜாவின் திரையுலக சாதனைகளைப் போற்றும் வகையிலும், அவர் தமிழ் சினிமாவிற்கு ஆற்றிய பங்களிப்பைச் சிறப்பிக்கும் வகையிலும், “அவரது இறுதிப் பயணத்திற்கு அரசு மரியாதை வழங்கப்படும்” என்று முதலமைச்சர் விஜய் உறுதியளித்துள்ளார்.
1977-ல் ’16 வயதினிலே’ திரைப்படத்தில் தொடங்கிய இவரது பயணம், பத்மஸ்ரீ விருது வரை நீண்டுள்ளது. இயக்குநராக மட்டுமல்லாமல், குணச்சித்திர நடிகராகவும் பலரது இதயங்களில் இடம்பிடித்த பாரதிராஜாவின் உடல் தற்போது பொதுமக்கள் அஞ்சலிக்காக வைக்கப்பட்டுள்ளது. இறுதிச்சடங்குகள் குறித்த கூடுதல் விவரங்கள் விரைவில் வெளியாகும் என எதிர்பார்க்கப்படுகிறது.
