குமரி மாவட்ட மீனவர்களின் நீண்ட நாள் கோரிக்கையான ஹெலிகாப்டர் சேவைக்கு மாற்றாக, அதிநவீன ‘கடல் ஆம்புலன்ஸ்’ (Sea Ambulance) திட்டத்தைக் கொண்டு வர அரசு திட்டமிட்டு வருவதாக மீன்வளத்துறை அமைச்சர் ஸ்ரீநாத் தெரிவித்துள்ளார்.
குமரி மாவட்டத்தில் ஆய்வுப் பணிகளை மேற்கொண்ட அமைச்சர் ஸ்ரீநாத், மீனவர்களின் கோரிக்கைகள் மற்றும் கடல்சார் பாதுகாப்பு நடவடிக்கைகள் குறித்து செய்தியாளர்களின் கேள்விகளுக்குப் பதிலளித்தார்.
மீனவர் பகுதிகளில் அடிக்கடி விபத்துக்கள் ஏற்படுவதாகவும், இதற்கான காரணங்களைக் கண்டறிந்து நிரந்தரத் தீர்வு காண வேண்டும் என்றும் மீனவர்கள் நீண்ட காலமாக வலியுறுத்தி வருகின்றனர். இது குறித்த கேள்விக்குப் பதிலளித்த அமைச்சர், “மீனவர்கள் தெரிவித்துள்ள கோரிக்கைகள் அனைத்தும் அரசின் கவனத்திற்கு கொண்டு செல்லப்பட்டுள்ளன. விபத்துக்களைத் தடுக்கத் தேவையான அனைத்து நடவடிக்கைகளும் துறை ரீதியாக விரைந்து எடுக்கப்படும்” என்று உறுதியளித்தார்.
கேரள கடற்கரைப் பகுதிகளில் மீன்பிடித் தொழிலில் ஈடுபட்டுள்ள குமரி மாவட்ட மீனவர்கள், விபத்து காலங்களில் சக மீனவர்களையே நம்பியிருக்க வேண்டிய சூழல் நிலவுகிறது. இதனைச் சுட்டிக்காட்டிய செய்தியாளர்கள், மீனவர்களின் முக்கிய கோரிக்கையான ‘ஹெலிகாப்டர் சேவை’ குறித்துக் கேள்வி எழுப்பினர்.
இதற்குப் பதிலளித்த அமைச்சர், “ஹெலிகாப்டர் சேவைக்கு மாற்றாக, கடலில் விபத்தில் சிக்கும் மீனவர்களை விரைந்து மீட்கும் வகையில் ‘கடல் ஆம்புலன்ஸ்’ (Sea Ambulance) திட்டத்தை அமல்படுத்துவது குறித்து ஆலோசித்து வருகிறோம். இத்திட்டத்தைச் செயல்படுத்துவது தொடர்பான பணிகள் தற்போது விவாதக் கட்டத்தில் உள்ளன. அரசுக்குச் சற்று அவகாசம் அளித்தால், ஒவ்வொன்றாகத் திட்டமிட்டு நிச்சயம் நிறைவேற்றுவோம்” என்று தெரிவித்தார்.
மீனவர்களின் பாதுகாப்பு நலனை முன்னிட்டு அரசு எடுத்து வரும் இந்த நடவடிக்கைகள், மீனவர் சமூகத்தினரிடையே பெரும் எதிர்பார்ப்பை ஏற்படுத்தியுள்ளது.
