சிங்கப்பூர் : இந்தியர்கள் அதிகம் பயணிக்க விரும்பும் நாடுகளாக ஆஸ்திரேலியா, கனடாவும் மாறியுள்ளது. இதன் மூலம் இந்தியர்களால் அதிகம் விரும்பப்படும் நாடு என்ற பெருமையை அமெரிக்கா இழந்துவிட்டது. ஒரு நாட்டின் குடிமகன் விசா இல்லாமல் எத்தனை நாடுகளுக்கு செல்ல முடியும் என்பதை வைத்தே அந்த நாட்டின் பாஸ்போர்ட் எவ்வளவு மதிப்பு மிக்கது என்று கண்டறியப்படுகிறது.
இத்தகைய மதிப்பு மிக்க பாஸ்போர் கொண்ட நாடுகளின் பட்டியலை தனியார் ஆய்வு நிறுவனம் வெளியிட்டுள்ளது. இந்த பட்டியலில் முதல் இடத்தில் உள்ள சிங்கப்பூரில் இருந்து 192 நாடுகளுக்கு விசா இல்லாமல் பயணிக்க முடியும். இதற்கு அடுத்த இடத்தில் உள்ள ஜெர்மனி , இத்தாலி, ஸ்பெயின் ஆகிய நாடுகளில் இருந்து 190 நாடுகளுக்கும் ஜப்பான், பிரான்ஸ் ஆகிய நாடுகளில் இருந்து 189 நாடுகளுக்கும் டென்மார்க், பிரிட்டன் நாடுகளில் இருந்து 188 நாடுகளுக்கும் நியூசிலாந்து, சுவிட்சர்லாந்து நாடுகளில் இருந்து 187 நாடுகளுக்கும் ஆஸ்திரேலியா, போலாந்து நாடுகளில் இருந்து 186 நாடுகளுக்கும் கனடாவில் இருந்து 185 நாடுகளுக்கும் அமெரிக்காவில் இருந்து 184 நாடுகளுக்கும் விசா இன்றி செல்லலாம்.
இந்த பட்டியலில் 80வது இடத்தில் உள்ள இந்தியாவில் இருந்து 57 நாடுகளுக்கு செல்ல விசா தேவை இல்லை. ஆய்வின் படி வெளிநாட்டு பயணம் குறித்த இந்தியர்களின் எண்ண ஓட்டம் மாறி இருக்கும் தெரியவந்துள்ளது. அதாவது கல்வி மற்றும் சுற்றுலா போன்றவற்றிற்கு இந்தியர்களின் முக்கிய தேர்வாக இருந்த அமெரிக்கா தற்போது பின்னுக்கு தள்ளப்பட்டு அந்த இடத்தை ஆஸ்திரேலியாவும் கனடாவும் பிடித்துள்ளன. விசா தருவதில் தொடர்ந்து கெடுபிடிகளை கடைபிடித்து வருவதால் உயர்கல்விக்காக அமெரிக்காவை நாடிய இந்தியர்களை அண்டை நாடான கனடா மற்றும் பொருளாதாரத்தில் போட்டி நாடுகளாக உள்ள இங்கிலாந்து, ஐரோப்பிய யூனியன் நாடுகளை தேர்வு செய்கின்றனர்.